Hefja beint áætlunarflug á milli Akureyrar og London
.jpg)
MVFBreska flugfélagið EasyJet mun hefja áætlunarflug til Akureyrar í vetur og fljúga þaðan til London tvisvar í viku. EasyJet er eitt stærsta flugfélag Evrópu svo ljóst er að þetta er mjög jákvætt fyrir ferðaþjónustu á Norðurlandi.
Opnað hefur verið fyrir sölu á flugsætum á milli Akureyrar og Gatwick og verður flogið á þriðjudögum og laugardögum.
„Þetta er mikið gleðiefni fyrir ferðaþjónustuna á Norðurlandi. Það skiptir miklu máli fyrir samfélagið að opna fleiri gáttir inn í landið og nýta þau tækifæri sem því fylgja. Mikill árangur hefur náðst í því að styðja við uppbyggingu alþjóðlegs millilandaflugs á landsbyggðinni og metfjöldi erlendra áfangastaða í boði á landsbyggðinni í ár. Þetta er ánægjuleg þróun sem skiptir máli fyrir þjóðarbúið allt og staðfesting á því að stefna stjórnvalda sé að virka,“segir Lilja Dögg Alfreðsdóttir menningar- og viðskiptaráðherra.
Markaðsstofa Norðurlands hefur átt í viðræðum við flugfélagið frá árinu 2014. Vonast er til að þetta bæti við miklum fjölda gistinátta ferðamanna á Norðurlandi.
EasyJet mun einnig í samstarfi við ferðaskrifstofuna EasyJet Holidays bjóða upp á pakkaferðir til Norðurlands. EasyJet tilkynnti Akureyri sem nýjan áfangastað fyrr í dag ásamt þrettán öðrum. Fyrsta flugferðin til Akureyrar er 31. október og verður flogið tvisvar í viku út mars 2024.
Styrkja áfram markaðssetningu á flugvöllunum á Egilsstöðum og Akureyri
Menningar- og viðskiptaráðuneytið leggur nú lokahönd á samninga við EasyJet. Samningarnir eru í gegnum Flugþróunarsjóð sem hefur það að markmiði að styðja við uppbyggingu nýrra flugleiða til Íslands, þannig að koma megi á reglulegu millilandaflugi um alþjóðaflugvellina Akureyri og Egilsstaði.Með þessu er stuðlað að dreifingu ferðamanna um landið í samræmi við Framtíðarsýn og Leiðarljós íslenskrar ferðaþjónustu til ársins 2030, bættri nýtingu innviða ríkisins, bættum búsetuskilyrðum og lífsgæðum heimamanna og bættum rekstrarskilyrðum atvinnureksturs á Norður- og Austurlandi.
Fyrr á árinu undirritaði ráðherra samninga í gegnum Flugþróunarsjóð, við Markaðsstofu Norðurlands og Austurbrú um kynningu á Norður og Austurlandi sem áfangastaði fyrir beint millilandaflug. Verður fjármununum meðal annars varið í þátttöku í samstarfsverkefninu Nature Direct, sem jafnframt er styrkt af Flugþróunarsjóði, framleiðslu á efni fyrir áfangastaðina, þátttöku á ferðasýningum og samskipti við ferðaheildsala og ferðaskrifstofur.
Er þetta í takt við stefnu stjórnvalda um að stuðla að aukinni dreifingu ferðamanna um allt land sem og styðja við vöruþróun og uppbyggingu nýrra áfangastaða. Markmið samningsins er að styðja við markaðssetningu á Norðurlandi og Austurlandi sem áfangastað fyrir beint millilandaflug um Akureyrarflugvöll og Egilsstaðaflugvöll.