Starfsumgjörð fyrirtækja á orkumarkaði tekin til skoðunar út frá samkeppnishæfni, orkunýtingu og orkuskiptum

Guðlaugur Þór Þórðarson, umhverfis-, orku- og loftslagsráðherra, hefur skipað starfshóp sem er falið það hlutverk að fara yfir starfsumgjörð fyrirtækja á orkumarkaði út frá samkeppnishæfni, orkunýtingu og orkuskiptum.

Á starfshópurinn m.a. að skoða hvort og þá hvernig skerpa þurfi á hlutverki fyrirtækja sem starfa á raforkumarkaði m.a. með tilliti til samkeppnissjónarmiða, framleiðslu, dreifingar, flutnings og sölu. Einnig á hópurinn að skoða hvort þróun regluverks, innviða- og viðskiptaumhverfis sé í takt við breyttar þarfir vegna orkuskipta og fjölbreyttari orkukosta.

Guðlaugur Þór Þórðarson, umhverfis-, orku- og loftslagsráðherra: „Virkur og samkeppnishæfur raforkumarkaður er nauðsynlegur grundvöllur orkuskipta. Við gerð orkuskiptaáætlunar verður horft til metnaðarfullra markmiða stjórnvalda í loftslagsmálum og uppbyggingu hringrásarhagkerfis.“

Meðal verkefna starfshópsins er að:

• Skoða samkeppnisumhverfi fyrirtækja á raforkumarkaði
• Skoða hvort þróun regluverks, innviða- og viðskiptaumhverfis sé í takt við breyttar þarfir vegna orkuskipta, fjölbreyttari orkukosta og meiri þátttöku notenda
• Skoða möguleika á bættri orkunýtingu og minni orkusóun
• Skoða hvernig raforkukerfið er í stakk búið til að taka við framleiðslu frá nýjum orkukostum með breytilegu framboði
• Skoða rafeldsneytisþátt orkuskiptanna
• Meta áhrif breytilegra orkugjafa á orkuverð 
• Greina hindranir þess að orkufyrirtæki nýti orkukosti sem eru í nýtingaflokki í rammaáætlun

Þá á starfshópurinn í tillögum sínum að vinna drög að orkuskiptaáætlun, þar sem horft er til annarra tengdra áætlana eins og aðgerðaáætlunar í loftslagsmálum og innviðaáætlunar fyrir orkuskipti. 

Starfshópinn skipa:

Guðrún Sævarsdóttir, formaður

Ari Trausti Guðmundsson

Tryggvi Másson

Starfshópurinn á að skila tillögu til ráðherra fyrir 1. maí 2024.