Jón Þ. Sigurgeirsson hefur látið af störfum sem efnahagsráðgjafi í menningar- og viðskiptaráðuneytinu
Jón hóf störf í menningar- og viðskiptaráðuneyti í mars 2022. Meðal helstu verkefna hans var að veita ráðherra ráðgjöf í viðskipta- og efnahagsmálum ásamt því að sinna málefnum Norðurslóða. Hann hefur nú sagt sig frá þeim störfum og tekur í dag við sem formaður bankaráðs Landsbankans.
Jón starfaði um árabil í Seðlabanka Íslands, meðal annars sem framkvæmdastjóri alþjóða- og markaðssviðs (2001-2006) og síðar framkvæmdarstjóri skrifstofu bankastjóra og alþjóðasamskipta (2008-2019). Hann starfaði jafnframt hjá Alþjóðagjaldeyrissjóðnum (AGS) í Washington, sem fulltrúi Norður- og Eystrasaltslanda í stjórn sjóðsins um nær átta ára skeið, þar til í janúar sl. Jón var stjórnarmaður í grísku bankasýslunni í fimm ár þegar unnið var að endurreisn gríska bankakerfisins og hann sat um skeið í stjórn Fjármálaeftirlitsins eftir fall íslensku bankanna. Jón var einnig stjórnarformaður eignasafns Seðlabanka Íslands og sat í framkvæmdanefnd um afnám gjaldeyrishafta.