Opnað fyrir styrki til garðyrkjubænda með reglugerð ráðherra
IstockJóhann Páll Jóhannsson, umhverfis-, orku- og loftslagsráðherra, hefur gert breytingu á reglugerð nr. 1566/2024 um Loftslags- og orkusjóð og falið sjóðnum að veita garðyrkjubændum sérstakan fjárfestingarstuðning í þágu bættrar orkunýtni og orkusparnaðar.
Opnað hefur verið fyrir umsóknir um styrkina á vef Loftslags- og orkusjóðs. Þetta er í fyrsta skipti í áratugi sem stjórnvöld ráðast í skipulegan fjárfestingarstuðning við framleiðendur garðyrkjuafurða.
Styrkir verða veittir til fjárfestingar í orkusparandi tækni, svo sem LED-ljósum, tölvu- og stýribúnaði og gardínukerfum með áherslu á verkefni sem auka rekstrarhagkvæmni gróðurhúsa og styðja við tæknivæðingu og samkeppnishæfni greinarinnar.
Hámarks styrkhlutfall er 40% af heildarkostnaði og hámarksfjárhæð 15 m.kr. fyrir hvern framleiðanda. Stjórn Loftslags- og orkusjóðs mun annast úthlutun styrkjanna samkvæmt ákvörðun og áherslum ráðherra. Samtals eru 160 m.kr. til úthlutunar og rennur umsóknafrestur út 6. júní. Gert er ráð fyrir öðru umsóknarferli í janúar 2026.
Fjárfestingarstuðningnum er ætlað að koma til móts við háan stofnkostnað fyrir framleiðendur garðyrkjuafurða þegar skipt er yfir í orkusparandi búnað. Þannig verður stutt við orkunýtni, framleiðni og sjálfbæra matvælaframleiðslu á Íslandi.
Styrkir til orkusparandi aðgerða í gróðurhúsum
Reglugerð um (2.) breytingu á reglugerð nr. 1566/2024 um Loftslags- og orkusjóð