Rannsóknir og nýting jarðhita liður í bættu orkuöryggi

Fjölbreyttir orkugjafar og aukin nýting jarðhita geta lagt grunninn að bættu orkuöryggi, sagði Jóhann Páll Jóhannsson, umhverfis-, orku- og loftslagsráðherra á óformlegum fundi orkumálaráðherra ESB ríkja í Varsjá í Póllandi í dag. Fundinn sitja einnig orkumálaráðherrar EFTA ríkja.

Enduruppbygging orkuinnviða í Úkraínu og Moldóvu var meðal umræðuefna á fundinum og vakti Jóhann Páll athygli á hvernig jarðhiti geti nýst í þeim efnum.

„Ísland stendur með Úkraínu. Stuðningur við orkuöryggi Úkraínu í dag varðar veginn að bættu öryggi evrópska orkukerfisins í heild næstu áratugi. Þetta er ekki aðeins fjárfesting í orkuinnviðum heldur líka fjárfesting í fyrirkomulagi frjálslynds lýðræðis og sameiginlegum gildum okkar,“ sagði Jóhann Páll.

Hann benti á að Ísland býr að mikilli þekkingu og reynslu á sviði jarðhita, meðal annars hvernig nýta megi lághitasvæði, sem eindreginn vilji sé til að deila með Úkraínu og Moldóvu. „Þegar hætta stafar að raforkukerfum er hagkvæmt að hafa kerfi sem eru óháð hvert öðru. Þetta getur til dæmis átt við um nýtingu jarðhita til fjarhitunar. Þar eru tækifæri sem Evrópa og heimurinn allur getur nýtt sér, meðal annars með aukinni nýtingu jarðhita og breyttu verklagi varðandi hitun og kælingu. Þetta á sérstaklega við varðandi hitaveitur,“ sagði Jóhann Páll.

Stuðningur við orkumál hefur verið í forgangi hjá íslenskum stjórnvöldum að beiðni úkraínskra stjórnvalda. Auk stuðnings í gegnum Alþjóðabankann hefur framlögum verið veitt til sérstaks orkusjóðs fyrir Úkraínu og verkefni Þróunaráætlunar Sameinuðu þjóðanna (UNDP) um styrkingu á orkuinnviðum í landinu. 

Orkumálaráðherrar ESB og EFTA ríkja funda í Varsjá í Póllandi.