Styrkjum úthlutað til atvinnumála kvenna

Styrkjum til atvinnumála kvenna var úthlutað á dögunum og veitti Inga Sæland, félags- og húsnæðismálaráðherra, þá við hátíðlega athöfn.

Styrkjum til atvinnumála kvenna hefur verið úthlutað frá árinu 1991 og eru þeir ætlaðir konum sem eru frumkvöðlar eða fyrirtækjum í þeirra eigu. Árlega er auglýst eftir umsóknum um styrki og er skilyrði styrkveitinga þau að verkefnin séu í meirihlutaeigu kvenna, stjórnað af þeim og feli í sér nýnæmi eða nýsköpun af einhverju tagi. 

Í ár bárust 239 umsóknir og voru þær metnar af ráðgjafarnefnd sem í sátu Elín Gróa Karlsdóttir, Hanna Dóra Björnsdóttir, Margrét Kr. Gunnarsdóttir og Soffía Gísladóttir.

Alls fengu 19 verkefni styrki að fjárhæð samtals 38.000.000 kr. Hæstu styrkir námu fjórum milljónum og hlutu fjögur verkefni þá upphæð:

Guðrún Heimisdóttir og Erna Niluka Njálsdóttir fyrir hönd Hvað nú?
Styrkur vegna verkefnisins Hvað nú? Markmið þess er að vera fyrsta heildstæða stuðningskerfið fyrir syrgjendur á Íslandi sem tryggir að þeir fái skýrar leiðbeiningar og aðstoð við að vinna úr þeim verkefnum sem fylgja ástvinamissi.

Ragnhildur Sigurðardóttir fyrir hönd Góðir dagar ehf.
Styrkur vegna verkefnisins Heyband en markmið þess er að finna lausnir á endurvinnslu á notuðu heyneti sem fellur til í verulegu magni hvarvetna þar sem landbúnaður er til staðar.

Rósa Dögg Þorsteinsdóttir fyrir hönd Visttorg ehf.
Styrkur vegna verkefnisins „Þróun sjálfvirkrar gagnaöflunar og gervigreindarlausna fyrir Vistbók“ en Vistbók er gagnadrifin lausn sem mun bjóða upp á sjálfvirka gagnaöflun, rauntímagreiningu og miðlun vistvænna gagna inn í aðfangakerfi byggingargeirans.

Arna Sigrún Haraldsdóttir
Styrkur til að vinna að vöruþróun og framleiðslu á fatnaði sem hentar hreyfihömluðum þar sem venjulegur fatnaður hentar ekki fólki sem er í hjólastól.

Önnur verkefni sem fengu styrk

Af öðrum verkefnum má nefna þróun afurða úr frostþurrkuðum sjávarafurðum, vöruþróun bætiefnis úr sjávargróðri, þróun próteins úr sælkerasveppum og rannsókn á notkun jarðhitaaflstækni til að vinna bast trefjar úr lúpínu, hampi og hör.

Þá má nefna þróun sjálfbærrar matvælaframleiðslu með vatnsrækt og samrækt (aquaponics og hydroponics), þróun leirs til framleiðslu á flísum, þróun efni úr lífrænum úrgangi sem geta komið í stað hefðbundinna byggingarefna, nýting skelja í næringarefni, dren og skraut fyrir plöntur, brauðframleiðslu á Stöðvarfirði, greiningu á fýsileika þess að rækta saffran, þróun á leir sem sjálfbærs hráefni fyrir keramik og nytjalist, þróun á sjónvarpsefni fyrir börn og gervigreindarlausn sem sjálfvirknivæðir bókhaldsferla fyrirtækja með notkun spunagreindar.

Kynning á viðskiptahugmynd

Styrkhöfum sem fengu styrk til að gera viðskiptaáætlun var boðið upp á þátttöku í fyrirtækjasmiðju á netinu. Þátttakendur útbjuggu kynningu á viðskiptahugmynd sinni og héldu kynningu fyrir dómnefnd. Í boði var ein milljón króna í verðlaun fyrir bestu kynninguna.  

Sigur úr býtum bar Shrutti Basappa fyrir verkefnið Smiðjumúr. Verkefnið gengur út á það að nýta leir og önnur jarðefni á Íslandi í það að þróa 100% íslenskar flísar, klæðningar og múrsteina úr íslenskum leir. Í dómnefnd sátu þær Auður Ösp Ólafsdóttir, Grace Achieng og Hanna Kristín Skaftadóttir.

Sjá frétt á vefnum atvinnumalkvenna.is.