Efling varnargetu og stuðningur við Úkraínu

Aukin útgjöld til varnarmála í þágu sameiginlegra varna, stuðningur við varnarbaráttu Úkraínu og undirbúningur fyrir leiðtogafund Atlantshafsbandalagsins í Haag voru meginefni fundar varnarmálaráðherra Atlantshafsbandalagsins, sem lauk í gær í höfuðstöðvum bandalagsins í Brussel. Fundað var í Atlantshafsráðinu meðal bandalagsríkja og í NATO-Úkraínuráðinu með þátttöku varnarmálaráðherra Úkraínu og utanríkismálastjóra Evrópusambandsins. Þá funduðu ráðherrar um kjarnavopnafælingu bandalagsins, sem er ein undirstaðan í fælingarstefnu þess. Í gær var jafnframt fundað í hópi ríkja sem styður við varnarbaráttu Úkraínu (e. Ukraine Defence Contact Group). Fastafulltrúi Íslands hjá Atlantshafsbandalaginu tók þátt í fundunum fyrir Íslands hönd.

Fundur varnarmálaráðherranna var síðasta varðan á leiðinni til Haag þar sem leiðtogafundur Atlantshafsbandalagsins verður haldinn dagana 24.-25. júní næstkomandi. Farið var yfir undirbúning leiðtogafundarins og staðan tekin á helstu málum, þar með talið auknum framlögum til varnarmála til að mæta vaxandi skuldbindingum og styrkja sameiginlegar varnir bandalagsins. Varnar- og fælingarstefna bandalagsins og ógnin frá Rússlandi voru undirliggjandi í umræðunni, sem og áframhaldandi stuðningur við Úkraínu og friðarumleitanir Bandaríkjanna. 

„Nú beinast augu að leiðtogafundinum í Haag sem verður um margt sögulegur. Umhverfi öryggis- og varnarmála hefur tekið stakkaskiptum á umliðnum árum og bandalagið aðlagað sig að breyttum veruleika. Rússland verður ógn í bráð og lengd, og stuðningur við varnarbaráttu Úkraínu er jafnframt okkar fyrsta varnarlína, fyrir okkar gildum og alþjóðalögum. Aðildarríki bandalagsins eru að stórauka framlög sín til varnarmála og Ísland mun halda áfram að axla auknar byrðar sem traust og ábyrgt bandalagsríki. Mótun nýrrar varnarmálastefnu fyrir Ísland er meðal annars liður í því,“ segir Þorgerður Katrín Gunnarsdóttir utanríkisráðherra.