Skuldahlutfall ríkissjóðs lækkar um 5% við uppgjör ÍL-sjóðs
Tillaga um uppgjör ÍL-sjóðs var lögð fyrir fund skuldabréfaeigenda í flokkunum HFF34 og HFF44 þann 10. apríl s.l. og var hún samþykkt með meirihluta atkvæða. Virði HFF-bréfanna í uppgjörinu er metið á 651 ma.kr. Í framhaldi var óskað eftir heimild í frumvarpi til fjáraukalaga til að ganga til uppgjörs í samræmi við tillöguna og samþykkti Alþingi frumvarpið á dögunum.
Uppgjör skuldbindinga ÍL-sjóðs fer fram þann 12. júní. Í tengslum við uppgjörið mun ríkissjóður gefa út níu nýja flokka ríkisbréfa (sjá töflu), samtals að nafnverði 487 ma.kr.
|
|
Nafnverð |
|
RIKS 29 0917 |
67.000.000.000 |
|
RIKS 34 1016 |
60.353.539.382 |
|
RIKS 36 0815 |
59.000.000.000 |
|
RIKS 39 1115 |
49.000.000.000 |
|
RIKS 41 0815 |
50.000.000.000 |
|
RIKS 44 1017 |
50.313.049.596 |
|
RIKS 47 1115 |
48.000.000.000 |
|
RIKS 50 0915 |
47.000.000.000 |
|
RIKB 32 1015 |
56.000.000.000 |
Með afhendingu umræddra bréfa greiðir ríkissjóður upp lán sem ÍL-sjóður veitti ríkissjóði á árunum 2020 og 2021, samtals að fjárhæð 238 ma.kr.
Ríkissjóður mun einnig afhenda 378 milljónir evra (um 55 ma.kr.) af gjaldeyrisinnstæðum sem fjármagnaðar voru með nýlegri skuldabréfaútgáfu í evrum.
Við uppgjörið mun ríkissjóður fá afhentar aðrar eignir ÍL-sjóðs en þær sem verða nýttar í uppgjörinu; þ.á.m. skuldabréf Húsnæðissjóðs, lánasafn og skuldabréf Bríetar leigufélags, samtals að fjárhæð um 222 ma.kr.
Nettó áhrif á skuldahlutföll A hluta ríkissjóðs (skilgreining skv. Maastricht) eru lækkun um rúmlega 5% af VLF.