Upphafsfundur nefndar WHO um lýðheilsu og loftslagsbreytingar
Alma D. Möller heilbrigðisráðherra tók þátt í upphafsfundi nefndar Alþjóðaheilbrigðisstofnunarinnar (WHO) um lýðheilsu og loftslagsbreytingar sem fram fór í Hörpu í gær. Formaður nefndarinnar er Katrín Jakobsdóttir en í henni sitja ellefu fulltrúar, m.a. fyrrverandi stjórnmálaleiðtogar og áhrifamiklir einstaklingar með þekkingu á sviði loftslags- og heilbrigðismála. Dr. Hans Kluge, framkvæmdastjóri Evrópuskrifstofu WHO kom til Íslands af þessu tilefni. Hann og Alma áttu tvíhliða fund þar sem þau ræddu m.a. um smáríkjasamstarf WHO, lýðheilsu og forvarnir, geðheilbrigðismál, aðgerðir gegn ofbeldi og síðast en ekki síst ástand heilbrigðismála á Gaza.
Loftslagsbreytingar eru gríðarleg ógn við lýðheilsu á heimsvísu. Hlutverk nefndar WHO er að meta áhrif lofslagsbreytinga á heilsu fólks og móta tillögur sem ríki Evrópu geta nýtt sér til að sporna við alvarlegum áhrifum loftslagsbreytinga. Liður í því er að efla pólitíska vitund og vilja stjórnmálamanna til að takast á við þennan vanda með markvissum aðgerðum.
