Áformaskjal um tálmun aðstandenda á lögreglurannsóknum

Dómsmálaráðherra hefur lagt inn áformaskjal í samráðsgátt varðandi breytingar á almennum hegningarlögum nr. 19/1940 sem snúa að tálmun lögreglurannsókna þegar náinn vandamaður á í hlut.

Lögum samkvæmt er refsivert að aðstoða einstakling sem veitt er eftirför vegna brots sem og um tálmun sakamálarannsóknar og getur það leitt til sekta eða fangelsisvistar í allt að ár.
Hins vegar er þetta sama athæfi með öllu refsilaust þegar um nána vandamenn ræðir og gildir þá engu um alvarleika brots, jafnvel þótt um alvarleg brot á borð við manndráp er að ræða.

Alvarlegar afleiðingar

Umrætt ákvæði um refsileysi náinna vandamanna kann að gera lögreglu og ákæruvaldi erfiðara fyrir við rannsókn mála enda gegnir öflun og meðferð sönnunargagna lykilhlutverki við það að upplýsa sakamál og stuðlar að því að rétt verði leyst úr þeim. Þá er ekki útilokað að tálmun sakamálarannsóknar leiði til þess að sá sem fremur afbrot komist undan refsiábyrgð.

„Það er grafalvarlegt þegar fólk tálmar sakamálarannsókn, hvort sem um náinn ættingja er að ræða eða aðra. Það getur ekki verið takmarkalaust hversu langt aðstandendur geti gengið í því að tálma. Það samræmist ekki okkar réttlætiskennd. Það er algjörlega tímabært að endurskoða þessi mál, meðal annars skoða hvernig sambærilegum lagaákvæðum er háttað á hinum Norðurlöndunum. Þessi vinna er nú að hefjast innan ráðuneytis og væntum við þess að kynna frumvarp þar að lútandi á næsta haustþingi,“ segir Þorbjörg Sigríður Gunnlaugsdóttir dómsmálaráðherra.