Hoppa yfir valmynd
2. febrúar 2006 Samgöngu- og sveitarstjórnarráðuneytið

Umferd.is

Nýr umferðarfræðsluvefur var opnaður formlega af Sturlu Böðvarssyni fyrr í dag.

Sturla Böðvarsson opnar vefinn umferd.is
Sturla Böðvarsson opnar vefinn umferd.is

Gerð vefsins er þáttur í umferðaröryggisáætlun stjórnvalda, sem stefna að því að fjöldi látinna og alvarlegra slasaðra í umferðinni lækki að jafnaði um 5% á ári að jafnaði.

Umferðarfræðsla í grunnskólum er ein af meginaðgerðum umferðaröryggisáætlunar og hefur samgönguráðuneytið ákveðið að 62 milljónum skuli varið til umferðaröryggisfræðslu í grunnskólum á árunum 2005-2008.

Verkefnið er þegar hafið og síðastliðinn september undirrituðu Umferðarstofa og Grundaskóli á Akranesi samning þess efnis að Grundaskóli verði móðurskóli umferðarfræðslu á grunnskólastigi og öðrum skólum til ráðgjafar á því sviði. Við skólann starfar verkefnisstjóri og teymi kennara sem sinnir umferðarfræðslu sérstaklega. Í störfum þeirra felst meðal annars að skipuleggja og stjórna námskeiðum og fræðslufundum fyrir kennara grunnskóla á landinu öllu. Að auki hefur verið unnið að nýjum umferðarvef, í samstarfi við Námsgagnastofnun, sem nú hefur verið opnaður.

Vefurinn er þrískiptur; krakkavefur fyrir yngstu grunnskólanemendurna, unglingavefur og síðan er vefur sem er ætlaður kennurum og foreldrum.

Gert er ráð fyrir að á vefnum verði í framtíðinni fjölbreytt fræðsluefni við hæfi allra aldursflokka innan grunnskólans, þar á meðal vefleiðangrar, vefrallý og ýmiss konar leikir og þrautir. Honum er ætlað að vera í sífelldri þróun og verður bætt við námsefni eftir því sem þörf krefur hverju sinni.

Vefurinn markar ákveðin tímamót í umferðarfræðslu í grunnskólum hér á landi, þar sem fræðslan er nú markvissari en áður. Í könnunum sem gerðar hafa verið kemur í ljós að í mörgum grunnskólum er nánast engin umferðarfræðsla, í allmörgum skólum er einhver fræðsla en alls ekki nógu markviss. Nokkrir skólar skera sig þó úr í þessum efnum og hafa alltaf sinnt fræðslunni með mikilli prýði.

Rannsóknarráð umferðaröryggismála (RANNUM) hefur á undanförnum árum veitt nokkra styrki til kannana á stöðu umferðarfræðslu í skólum og einnig til gerðar námsefnis og má segja að hluta þess efnis sem er á umferðarvefnum megi rekja til þeirra styrkja.

Í kjölfar opnunar vefsins www.umferd.is munu kennarar í Grundaskóla annast kynningu á umferðarfræðslu og halda námskeið fyrir kennara um möguleika vefsins í umferðarfræðslu. Forráðamenn skóla geta haft samband við Grundaskóla hafi þeir áhuga á að halda námskeið eða fræðslufundi fyrir kennara.

Hér fyrir neðan má sjá þær umferðaröryggisaðgerðir sem unnið er að:

Umferðaröryggisaðgerðir: Fækkun látinna Fækkun alvarlegra slasaðra Fjármögnun 2005-2008
Hraðakstur og bílbeltanotkun

2,5

4,8

687

Leiðbeinandi hraðamerkingar

0,3

0,9

17

Eyðing svartbletta

0,5

2,3

312

Ölvun/fíkniefni við akstur

0,5

2,7

228

Umferðaröryggi í öryggisstjórnun fyrirtækja

0,1

0,6

15

Umferðaröryggi í námsskrá grunnskóla

0,2

1,0

62

Öryggisbeltanotkun í hópbifreiðum

0,0

0,3

16

Forvarnir erlendra ökumanna

0,2

1,2

47

Slysum og óhöppum v. lausagöngu búfjár fækkað með girðingum

0,1

0,7

156

Samtals

4,2

14,5

1.540 m.



Efnisorð

Hafa samband

Ábending / fyrirspurn
Ruslvörn


Þessi síða notar vafrakökur Lesa meira