Hoppa yfir valmynd
8. júní 2012 Utanríkisráðuneytið

Fundur um forvarnir vegna olíuvinnslu  á norðurslóðum.

Frá olíuvinnslu á norðurslóðum
Frá olíuvinnslu á norðurslóðum

Sérfræðingar Norðurskautsráðsins funda í Keflavík dagana 10.-12. júní næstkomandi um forvarnir vegna olíumengunar  á norðurslóðum en á fundinum verður m.a. fjallað um hvað læra megi af reynslunni af olíulekanum í Mexíkóflóa 2010. Ráðið hefur frá upphafi lagt ríka áherslu á náið samráð meðal norðurskautsríkjanna um rannsóknir, forvarnir og viðbrögð við mengun m.a. frá olíu, kvikasilfri og ýmsum eiturefnum.

Tveir starfshópar ráðsins, annars vegar um verndun á hafsvæðum norðurslóða (PAME) og hins vegar hópur um varnir, viðbúnað og viðbrögð við umhverfisvá (EPPR) funda í Keflavík um málefni er tengjast forvörnum vegna olíuvinnslu á norðurslóðum vegna aukins aðgengis að auðlindum svæðisins. Samhliða þessari vinnu er nú unnið að gerð samkomulags um sameiginleg viðbrögð norðurskautsríkjanna átta við olíumengun í norðurhöfum.

Forvarnir og viðbrögð við umhverfisvá eru meðal helstu áherslumála Íslands á vettvangi Norðurskautsráðsins. Fundinn sækja sérfræðingar norðurskautsríkjanna á þessu sviði og eru fultrúar Íslands m.a. frá Umhverfisstofnun, Landhelgisgæslunni, Orkustofnun  og hlutaðeigandi ráðuneytum.  

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum