Allsherjarnefnd fundar um skipulagða glæpastarfsemi með ráðherra og lögreglu

Vísbendingar eru um að alvarleg skipulögð glæpastarfsemi sé að færast í vöxt hérlendis og að alþjóðlegir glæpahringir séu að skjóta hér rótum. Í mars á síðasta ári samþykkti ríkisstjórnin sérstaka fjárveitingu vegna tólf mánaða átaksverkefnis lögreglu til þess að vinna með markvissum hætti gegn skipulagðri brotastarfsemi á Íslandi. Sérstöku rannsóknarteymi ríkislögreglustjóra, lögreglustjórans á höfuðborgarsvæðinu og lögreglustjórans á Suðurnesjum um starfsemi mótorhjólagengja hér á landi var þegar í stað komið á laggirnar en auk þessara embætta hefur embætti tollstjóra komið að verkefninu. Fyrir hendi er öflugt samstarf og samvinna lögreglu og annarra stofnana, innanlands sem erlendis, í þessum efnum, einkum við löggæsluyfirvöld á Norðurlöndum og hjá Europol.

Á fundinum verður farið yfir mat rannsóknarteymisins á stöðu skipulagðrar glæpastarfsemi hér á landi og árangur af starfi rannsóknarteymisins. Þá verður rætt um aðgerðir á breiðum grundvelli á næstu misserum til þess að stemma stigu við skipulagðri brotastarfsemi og fyrirsjáanlega þróun í þessum málum.