Hoppa yfir valmynd
28. febrúar 2020 Utanríkisráðuneytið

„Leggið ykkur fram um að sýna frumkvæði og hafa áhrif“

„Þegar heim kemur vona ég að þið leggið ykkur fram um að kynna vinnuna ykkar á Íslandi, taka þátt í umræðum, sýna frumkvæði og hafa áhrif,“ sagði Þór H. Ásgeirsson forstöðumaður Sjávarútvegsskólans við athöfn í vikunni þegar 24 nemendur útskrifuðust frá skólanum eftir sex mánaða nám á Íslandi. Tólf konur og tólf karlar voru í útskriftarhópnum að þessu sinni, frá tólf löndum í Asíu, Afríku og Karíbahafi.

Kristján Þór Júlíusson sjávarútvegs- og landbúnaðarráðherra vakti í ávarpi athygli á gildi þess að styðja heimsmarkmið Sameinuðu þjóðanna, meðal annars fjórtánda markmiðið þar sem hafið er sett í öndvegi og kallað eftir aðgerðum til að stuðla að verndun og sjálfbærri nýtingu á auðlindum þess. Kristján lýsti yfir þeirri von að sú þekking og reynsla sem útskriftarnemar hefðu öðlast á þeim sex mánuðum sem þeir dvöldust á Íslandi myndi nýtast þeim vel í starfi og stuðla að þróun sjávarútvegs heima fyrir.

Nemendahópurinn sem útskrifaðist er tuttugasti og annar árangurinn sem útskrifast frá Sjávarútvegsskólanum en alls hafa 414 nemendur frá 60 þjóðríkjum lokið námi við skólann. Að þessu sinni sérhæfðu sjö nemendur sig á sviði stefnumótunar og stjórnunar, sex á sviði matvælaframleiðslu og gæðastjórnunar, sex á sviði sjálfbærs fiskeldis og fimm á sviði stofnmats og veiðarfæratækni.

Við útskriftina gerði Bryndís Kjartansdóttir forstöðumaður GRÓ grein fyrir þeim skipulagsbreytingum sem tóku gildi um áramót í starfi skólanna fjögurra þegar GRÓ – þekkingarmiðstöð þróunarsamvinnu tók yfir samstarfið af háskóla Sameinuðu þjóðanna. GRÓ starfar undir merkjum UNESCO, mennta-, vísinda- og menningarmálastofnunar Sameinuðu þjóðanna en skólarnir eru reknir, á sama hátt og áður, sem hluti af alþjóðlegri þróunarsamvinnu Íslands gegnum utanríkisráðuneytið.

James John Banda frá Malaví hafði orð fyrir útskriftarnemendunum og þakkaði starfsfólki Sjávarútvegsskólans og leiðbeinendum, fyrirlesurum og öðrum þeim sem komu að þjálfunarnáminu í vetur fyrir stuðninginn meðan á Íslandsdvölinni stóð.

„Við fengum tækifæri til að auka færni okkar bæði persónulega og faglega,“ sagði hann.

Í meðfylgjandi kvikmyndabrotum eru viðtöl við þrjá útskriftarnemendur um lokaverkefni þeirra og upplifun þeirra af landi og þjóð.

Efnisorð

Heimsmarkmiðin

14. Líf í vatni
9. Nýsköpun og uppbygging
2. Ekkert hungur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum