Batnandi tannheilsa barna
Árlegt hlutfall barna hér á landi sem búa við það góða tannheilsu að ekki þarf að gera við neina tönn hefur hækkað úr rúmum 56% árið 2001 í 72,4% árið 2015. Ef fjölda tannviðgerða ár hvert er deilt niður á fjölda barna sem leituðu til tannlæknis sama ár hefur hlutfall viðgerðra tanna lækkað um nærri 60% frá árinu 2001 – 2015.
Upplýsingarnar taka til barna yngri en 18 ára sem eru sjúkratryggð hér á landi og eiga rétt á greiðsluþátttöku sjúkratrygginga í kostnaði vegna tannlækninga. Sjúkratryggingar Íslands (SÍ) hafa tekið saman upplýsingar sem sýna fjölda barna sem leituðu til tannlæknis ár hvert frá árinu 2001 – 2015 ásamt hlutfallslegum fjölda viðgerðra tanna í hverju barni, þ.e. deilt er með fjölda barna í fjölda tannviðgerða sem falla undir greiðsluþátttöku sjúkratrygginga. Í tilkynningu á vef stofnunarinnar segir:
„Árið 2001 var meðaltalið 1,57 viðgerð/barn en hefur síðan þá lækkað nær stöðugt ef frá eru skilin fyrstu tvö árin eftir að samningur um gjaldsfrjálsar tannlækningar barna tók gildi í maí árið 2013. Það var enda viðbúið að meðaltalið myndi hækka í byrjun þegar börn, sem áður höfðu ekki átt þess kost að láta sinna öllum tannviðgerðum sínum, gátu loks fengið þá þjónustu sem þau þurftu.“
Árið 2015 lækkaði meðaltalið aftur og voru viðgerðar tennur að meðaltali 0,65 í hverju barni og nemur hlutfallsleg fækkun viðgerðra tanna í hverju barni því um 59%.
Annar mælikvarði á tannheilsu barna er árlegt hlutfall þeirra barna sem býr við það góða tannheilsu að ekki þarf að gera við neina tönn. Árið 2001 var þetta hlutfall 56,2%, en árið 2015 hafði það hækkað í 72,4% og hefur aldrei verið hærra að því er fram kemur í umfjöllun SÍ.
