Hoppa yfir valmynd
24. september 2009 Innviðaráðuneytið

Ræddu fjármál sveitarfélaga við fulltrúa AGS

Nefnd frá Alþjóða gjaldeyrissjóðnum átti í vikunni fund í samgönguráðuneytinu með fulltrúum samráðsnefndar ríkis og sveitarfélaga um efnahagsmál.

Ráðgjafar Alþjóða gjaldeyrissjóðsins á sviði greiðslustjórnunar og einkaframkvæmda opinberra aðila hafa dvalið hér undanfarna daga til að afla sér upplýsinga um hvernig þeim málum er háttað bæði hjá ríki og sveitarfélögum. Voru nefndarmennirnir fræddir um starf og verkefni samráðsnefndarinnar sem snúast meðal annars um að greina ýmsa þróun og fjárhagsstöðu sveitarfélaga og leggja fram tillögur um að styrkja fjármálastjórn sveitarfélaga og veita þeim ráðgjöf varðandi aðkomu þeirra að hagstjórninni.

Fulltrúar Alþjóða gjaldeyrissjóðsins voru þau Richard Allen, John Gardner, Timothy Irwin and Greetje Everaert og með þeim var Kjartan Hauksson frá fjármálaráðuneytinu. Af hálfu samráðsnefndarinnar sátu fundinn þeir Jóhannes Finnur Halldórsson, sérfræðingur í samgönguráðuneytinu, Sigurður Snævarr borgarhagfræðingur, Rafn Sigurðsson frá fjármálaráðuneytinu og Benedikt Valsson frá Sambandi íslenskra sveitarfélaga.

Fulltrúar Alþjóða gjaldeyrissjóðsins ræddu við fulltrúa úr samráðsnefnd ríkis og sveitarfélaga um efnahagsmál.

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum