Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
4. apríl 2025 Utanríkisráðuneytið

Föstudagspóstur 4. apríl 2025

Heil og sæl.

Við hefjum yfirferðina á fundi utanríkisráðherra Atlantshafsbandalagsríkja sem fram fór í Brussel í vikunni. Þorgerður Katrín Gunnarsdóttir utanríkisráðherra sótti fundinn og greindi frá að mikil samstaða hefði einkennt fundi bandalagsins síðustu daga.

 

Á Brussel átti hún hina ýmsu fundi með kollegum, meðal annars utanríkisráðherra Belgíu og Kanada. Þorgerður Katrín tjáði sig einnig um Bandaríkin, Danmörku og Grænland og hve mikilvægu hlutverki þau gegna þegar kemur að öryggi á norðurslóðum og innan vébanda Atlantshafsbandalagsins. Þá óskaði hún Vivian Motzfeldt, utanríkisráðherra Grænlands, til hamingju en ný landsstjórn var mynduð á Grænlandi á dögunum. Kvaðst hún hlakka til áframhaldandi samstarfs en Motzfeldt gegndi sama embætti í síðustu landsstjórn. Þá gerði hún dráp á bráðaliðum sem voru við störf á Gaza að umfjöllunarefni í færslu á X. Þorgerður Katrín var stödd í Madríd undir lok síðustu viku og átti þar meðal annars fundi með José Manuel Albares, utanríkisráðherra Spánar, og Margaritu Robles varnarmálaráðherra.

Utanríkisráðuneytið hefur gefið út ferðaleiðbeiningar fyrir hinsegin fólk, sem unnar voru í samráði við Samtökin '78.

  

Ákvörðun ungverskra stjórnvalda um að draga sig úr Alþjóðlega sakamáladómstólnum var umfjöllunarefni færslu sem ráðuneytið birti á X.

Ellefta eldgosið á Reykjanesskaga frá árinu 2021 hófst í vikunni.

Helstu niðurstöður sameiginlegrar vinnustofu sem Ísland og Írland héldu um öryggi sæstrengja voru kynntar í höfuðstöðvum Atlantshafsbandalagsins í Brussel í vikunni. Kynningin var vel sótt af fulltrúum aðildarríkja og alþjóðastarfsliði bandalagsins.

  

Sendiráðið í Helsinki tók á móti hópi frá bæjarskrifstofu Mosfellsbæjar á dögunum.

  

Þá tók okkar fólk í Helsinki sömuleiðis á móti Íslandsdeild Norðurlandaráðs frá Alþingi sem stödd var í Finnlandi vegna vorþings ráðsins. Meðlimir deildarinnar fengu meðal annars kynningu frá Harald Aspelund sendiherra.

   

Harald og hans fólk tóku á móti fleirum en Norræna félagið í Helsinki heimsótti sendiráðsbústaðinn og fékk þar kynningu.

  

Pétur Ásgeirsson, sendiherra í Kaupmannahöfn, var viðstaddur opnun á sýningu myndlistarmannsins Tolla, Rhyolite Hymns, í Davis Gallery í Bredgade.

  

Þá tók Pétur á móti hópi eldri meðlima DJØF í sendiherrabústaðnum. DJØF stendur fyrir Danmarks Jurist og Økonomforbund og er, líkt og nafnið gefur til kynna, fagfélag lög- og hagfræðinga í Danmörku. Þar kynnti Pétur starfsemi sendiráðsins og fjallaði um íslenska menningu og listir. Þá gerði hann jafnframt grein fyrir stjórnskipun Íslands.

  

Sýning Alistairs Macintyre, Just Passing Through, var opnuð við hátíðlega athöfn í anddyri sendiráðsins í vikunni. Pétur Ásgeirsson sendiherra opnaði sýninguna formlega og Alistair ávarpaði gesti og sagði frá verkum sínum.

  

Helga Hauksdóttir, sendiherra í Vín, afhenti trúnaðarbréf til forseta Ungverjalands, Tamás Sulyok, 1. apríl síðastliðinn. Athöfnin fór fram í Sándor Palace í Búdapest. Í samtali sendiherra við forseta Ungverjalands var rætt um tvíhliða samband ríkjanna, sem á sér langa sögu, og þau sérstöku tengsl sem sköpuðust milli þeirra þegar Ísland tók á móti hópi ungverskra flóttamanna árið 1956. Löndin eru samstarfsríki í Atlantshafsbandalaginu sem og á vettvangi Öryggis- og samvinnustofnunar Evrópu og Sameinuðu þjóðanna. Þá hefur Ungverjaland einnig notið stuðnings frá Uppbyggingarsjóði EES í gegnum tíðina, meðal annars við uppbyggingu á nýtingu jarðhita. Helga átti einnig fundi með fulltrúum utanríkisráðuneytisins og kom þar á framfæri áhyggjum íslenskra stjórnvalda af stöðu mannréttinda og lýðræðis í Ungverjalandi, sem meðal annars birtist í takmörkunum á réttindum hinsegin fólks. Ísland hefur gagnrýnt Ungverjaland vegna þessa, meðal annars á vettvangi mannréttindaráðs Sameinuðu þjóðanna og með sameiginlegri yfirlýsingu sendiráða 22 erlendra ríkja gagnvart Ungverjalandi, sem birt var í síðustu viku.

  

Benedikt Höskuldsson, sendiherra í Nýju Delí, var til viðtals um ferðaþjónustuviðburð sem haldinn var í síðustu viku og fjallað var um á þessum vettvangi.

  

Sendiráðið í Osló er þessa dagana á fullu að undirbúa ríkisheimsókn forseta Íslands og sendinefndar sem fram fer í næstu viku. Á dögunum áttu starfsmenn þess fund með tengiliðum norska utanríkisráðuneytisins. Þar var farið yfir dagskrá heimsóknarinnar frá A-Ö.

  

Steinunn Sigurðardóttir rithöfundur var stödd í Stokkhólmi á dögunum og ræddi þar verk sín við John Swedenmark, þýðanda verkanna. Bryndís Kjartansdóttir, sendiherra í Stokkhólmi, ávarpaði samkomuna.

  

Sendiráðið í París tók á móti starfsfólki velferðarsviðs Reykjavíkurborgar í sendiráðsbústaðnum í vikunni ásamt starfsfólki félagsþjónustu Hauts-de-Seine í Frakklandi sem skipulagði fræðsludagskrá fyrir hópinn. Þau hafa m.a. kynnt sér starfsemi og ýmis áherslumál miðlægra stjórnvalda og stjórnsýslunnar í París og úthverfum borgarinnar. Unnur Orradóttir Ramette, sendiherra, kynnti starfsemi sendiráðsins og fastanefnda í París og starfsfólk sendiráðsins fékk jafnframt innsýn inn í störf velferðarsviðs.

  

Íslenskar bókmenntir njóta mikillar velgengni í Frakklandi og síðustu árin hafa þýðingar á franska tungu staðið upp úr þegar litið er til þýddra íslenskra bóka. Íslenskir rithöfundar eru tíðir og vinsælir gestir á bókmenntaviðburðum í Frakklandi og nýútkomnar íslenskar bækur iðulega vel sýnilegar á auglýsingaskiltum um alla París. Dr. Hanna Steinunn Þorleifsdóttir, fyrrverandi yfirmaður norrænu deildarinnar við háskólann í Caen í Frakklandi, heldur úti athyglisverðri vefsíðu með upplýsingum um allar þýðingar sem komið hafa út á frönsku. Hún og Bryndís Loftsdóttir, framkvæmdastjóri Félags íslenskra bókaútgefenda, eru nú á ferðalagi um Frakkland og komu þær á fund í sendiráðið í síðustu viku þar sem Hanna Steinunn færði sendiráðinu að gjöf hluta af safni hennar á þýddum íslenskum bókum.

Unnur Orradóttir Ramette, sendiherra í París, bauð Francois Heisbourg, ráðgjafa hjá hugveitunni International Institute for Strategic Studies, og sendiherrum nokkurra Evrópuríkja til hádegisverðarfundar.

Fastanefnd Íslands hjá Atlantshafsbandalaginu tók á móti íslenskri sendinefnd á dögunum. Dagskráin snerist að mestu um stöðuna í Úkraínu. Þá hitti Jörundur Valtýsson, fastafulltrúi Íslands hjá Atlantshafsbandalaginu, aðmírálinn Giuseppe Dragone á dögunum. Ræddu þeir árásargirni Rússa, öryggismál á norðurslóðum og utanríkisráðherrafund bandalagsins í þessari viku. Jörundur og samstarfsmenn hans hjá fastanefndinni, þeir Gautur, Atli Már og Jóhann, tóku þátt í hálfmaraþoni á dögunum. Ísland og EFTA-ríkin hitti fulltrúa Mercosur-ríkjanna á fundi í argentínsku höfuðborginni Buenos Aires á dögunum vegna yfirstandandi fríverslunarviðræðna.

Sendiráðið í Berlín sinnti í vikunni ýmis konar eftirfylgni vegna þátttöku Íslands á bókamessunni í Leipzig sem fram fór um síðustu helgi.

  

Sendiskrifstofur Íslands, Nýja Sjálands, Sviss og Kosta Ríka í Brussel stóðu í vikunni fyrir morgunverðarfundi og pallborðsumræðum í svissneska sendiráðinu. Umræðuefnið var alþjóðaviðskipti og sjálfbærni en þann 15. nóvember 2024 undirrituðu ríkin fjögur samning um loftslagsbreytingar, viðskipti og sjálfbæra þróun. Markmið samningsins er að nýta hefðbundin ákvæði viðskiptasamninga til að styðja við orkuskipti og aðrar aðgerðir í loftslags- og umhverfismálum.

  

Davíð Bjarnason, forstöðumaður sendiráðsins í Lilongwe, og hans fólk tóku þátt í viðburði þar sem var til umræðu hvernig megi sporna gegn barnahjónabandi, þungun á unglingsaldri og brottfall úr skóla.

  

Hannes Heimisson, aðalræðismaður Íslands í Færeyjum, tók á móti hópi flugmanna frá Icelandair sem nú undirgangast þjálfun á nýjar Airbus 321 þotur félagsins í flughermi Atlantic Airways í Þórshöfn. Hópar flugmanna frá Icelandair heimsækja Þórshöfn reglulega og fá þjálfun í flugherminum.

  

Undirbúningur fyrir heimssýninguna í Osaka er í fullum gangi. Ragnar Þorvarðarson, varamaður sendiherra í Tókýó, var staddur í Osaka í vikunni og heimsótti þar meðal annars samnorræna skálann.

Sendiráðið í Washington D.C. tók á móti laganemum frá Háskólanum í Reykjavík sem staddir eru í Bandaríkjunum vegna þátttöku í málflutningskeppni. Tónlistarkonunni Judith Ingolfsson var árnað heilla á reikningi sendiráðsins í Washington en hún hlaut nýverið orðu úr höndum menningarmálaráðherra Frakklands á viðburði í franska sendiráðinu í Washington.

Fleira var það ekki þessa vikuna.

Góða helgi!

Kveðja,

Upplýsingadeild

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Ef um er að ræða áríðandi erindi til borgaraþjónustu utanríkisráðuneytisins þá skal senda póst á [email protected]

Upplýsingar um netföng, símanúmer og staðsetningu ráðuneyta