Hoppa yfir valmynd
6. september 2018 Utanríkisráðuneytið

Stafræn tækni við manntal í Malaví ​

Manntal í Malaví. Ljósmyndir: ÁG - mynd

Þessa dagana er tekið manntal í Malaví. Stafræn tækni er notuð við gerð manntalsins í fyrsta sinn og spjaldtölvur leysa af hólmi spurningalista á pappír. Þetta er í sjötta skipti sem manntal er tekið í Malaví en síðasta manntal var tekið árið 2008. Mannfjöldastofnun Sameinuðu þjóðanna (UNFPA) færði stjórnvöldum 15 þúsund spjaldtölvur að gjöf í síðustu viku en reiknað er með að manntalsgerðin taki þrjár vikur.

Yfirskrift verkefnisins er „Be Counted – Leave No One Behind“ en manntalið felur ekki einvörðungu í sér skrá um alla þá einstaklinga sem búa í landinu heldur einnig söfnun ýmiss konar annarra tölfræðilegra gagna um íbúana sem gagnast stjórnvöldum við áætlanagerð.

„Upplýsingarnar sem safnað er saman við manntalsgerðina hafa mikið gildi fyrir alla þróun,“ segir Young Hong, fulltrúi UNFPA í Malaví. „Án nákvæmra upplýsinga um fólksfjölda, hvernig hann dreifist og hver lífsskilyrði íbúanna eru, gætu stjórnmálamenn ómögulega vitað hvar þyrfti að fjárfesta í skólum, sjúkrahúsum og samgöngum. Án manntalsins gætu þeir sem þarfnast mestrar hjálpar verið ósýnilegir áfram,“ segir hann.

Ágústu Gísladóttur forstöðumanni íslenska sendiráðsins í Lilongve var boðið, af hálfu UNFPA, að fylgjast með manntalsgerðinni í gær í sveitunum fyrir utan höfuðborgina. Ágústa tók þessar meðfylgjandi myndir á vettvangi.

Í fyrsta manntalinu sem tekið var árið 1966 voru íbúar Malaví 4 milljónir. Talið er að íbúar Malaví séu núna rétt tæplega 20 milljónir.

 

Malawi launches first-ever digital census/ UNFPA

15000 tablets handed over for 2018 Malawi Census/ UNFPA

Efnisorð

Heimsmarkmiðin

Heimsmarkmið sameinuðu þjóðanna

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira