Hoppa yfir valmynd
29. júlí 2011 Samgöngu- og sveitarstjórnarráðuneytið

Öryggisstjórnun vegamannvirkja

Drög að reglugerð um öryggisstjórnun vegamannvirkja liggja nú fyrir. Unnt er að senda ráðuneytinu umsögn um reglugerðardrögin til og með 19. ágúst nk. á netfangið [email protected].

Drögin fela í sér innleiðingu á tilskipun ESB um sama efni nr. 2008/96/EB frá 19. nóvember 2008. Í samræmi við gildissvið tilskipunarinnar ná ákvæði reglugerðarinnar til samevrópska vegakerfisins eins og það er skilgreint í ákvörðun nr. 1692/96/EB um viðmiðunarreglur bandalagsins við uppbyggingu samevrópska flutningakerfisins.

Markmið reglugerðarinnar er að stuðla að auknu umferðaröryggi, en talið er að umhverfi vega eigi þátt í um þriðjungi umferðarslysa á EES svæðinu. Með því að fylgja ákveðinni aðferðafræði sem felst í öryggisstjórnun vegamannvirkja og nánar er útfærð í reglugerðardrögunum á að vera tryggt að öryggi vegakerfisins sé ætíð haft að leiðarljósi, hvort sem um er að ræða á hönnunarstigi vegna nýs vegamannvirkis, við framkvæmdir eða við vegamannvirki sem þegar er í notkun.

Eftirfarandi aðgerðir skulu framkvæmdar við hönnun vegamannvirkja, við framkvæmdir og á vegum í notkun:

I. Umferðaröryggismat, þ.e. skipuleg samanburðargreining á áhrifum nýs vegar, eða verulegrar breytingar á núverandi vegakerfi, á öryggi vegakerfisins.

II. Umferðaröryggisrýni, þ.e. sjálfstæð, ítarleg, kerfisbundin og tæknileg öryggisskoðun í tengslum við hönnunarþætti vegamannvirkja sem tekur til allra stiga, frá forhönnun þar til þau hafa verið tekin í notkun.

III. Röðun vegarkafla þar sem slys eru mörg eða slysastíðni er há, en í því felst aðferð til að finna, greina og raða köflum vegakerfisins sem hafa verið í notkun í meira en þrjú ár og þar sem orðið hafa mörg banaslys og alvarleg slys miðað við umferðarmagn. Jafnframt eru greindir möguleikar á að auka öryggi og draga úr slysakostnaði.

IV. Umferðaröryggisúttekt, þ.e. reglubundin skoðun á eiginleikum vegamannvirkja í notkun í þeim tilgangi að finna ágalla sem krefjast lagfæringa.

Til fyllingar reglugerðardrögunum er gert ráð fyrir að settar verði verklagsreglur um eftirfarandi verkþætti:

I. Umferðaröryggismat á verkefnum á sviði vegamannvirkja

II. Umferðaröryggisrýni á verkefnum á sviði vegamannvirkja

III. Röðun og lagfæring vegarkafla þar sem slys eru mörg eða slysatíðni er há

IV. Umferðaröryggisúttektir

V.  Úrvinnslu slysaupplýsinga sem er að finna í slysaskýrslum

Reglugerðardrögin eiga stoð í 2. mgr. 46. gr. vegalaga nr. 80/2007. Lagt er til að þau gangi í gildi þann 1. október 2011.

Eins og áður sagði er umsagnarfrestur um drögin til 19. ágúst nk.

 

Efnisorð

Hafa samband

Ábending / fyrirspurn
Ruslvörn


Þessi síða notar vafrakökur Lesa meira