Norrænt jafnréttissamstarf í 30 ár
Samstarf Norðurlandanna í jafnréttismálum er 30 ára um þessar mundir. Af því tilefni hafa jafnréttisráðherrar Norðurlandanna ákveðið að efna til sérstaks hátíðarfundar í Borgarleikhúsinu föstudaginn 24. september næstkomandi kl. 13.45–17.00 undir yfirskriftinni Norrænt jafnréttissamstarf í 30 ár. Hvar stöndum við – hvert stefnum við? Formaður norrænu jafnréttisráðherranna, Árni Magnússon félagsmálaráðherra hefur skipað nefnd til að hafa umsjón með undirbúningi hátíðarinnar. Jónína Bjartmarz, alþingismaður og formaður Íslandsdeildar Norðurlandaráðs, stýrir starfi nefndarinnar.
Á hátíðarfundinum munu frú Vigdís Finnbogadóttir, forseti Íslands 1980–1996, frú Tarja Halonen, forseti Finnlands og hr. Marko Pomerants, félagsmálaráðherra Eistlands, halda erindi. Þá verða pallborðsumræður um jafnréttismál með þátttöku fulltrúa allra Norðurlandanna. Umræðunum stjórna Hildur Jónsdóttir, jafnréttisráðgjafi Reykjavíkurborgar, og Thomas Alslev Christensen, deildarstjóri hjá Norrænu ráðherranefndinni. Milli atriða flytja íslenskir listamenn tónlist.
Dagskrá fundarins (PDF, 80 KB)