Drög að breyttri reglugerð um ökuskírteini til umsagnar
Til umsagnar eru nú hjá innanríkisráðuneytinu drög að reglugerð um breytingu á reglugerð nr. 830/2011 um ökuskírteini. Umsagnarfrestur um drögin er til 5. desember næstkomandi og skal senda umsagnir á netfangið [email protected].
Með reglugerð þessari er tilskipun Framkvæmdastjórnarinnar 2011/94/ESB frá 28. nóvember 2011 um breytingu á tilskipun Evrópuþingsins og ráðsins 2006/126/EB um ökuskírteini innleidd í íslenskan rétt. Endurspegla ákvæði reglugerðarinnar atriði sem fram koma í tilskipuninni. Atriðin eru öll tæknilegs eðlis og fela ekki í sér efnislegar breytingar sem hafa áhrif á ökuskírteinishafa.
Eftirfarandi breytingar eru lagðar til á núgildandi reglugerð:
- Með 1. gr. er verið að færa bakhlið skírteinis til samræmis við fyrirmynd sem gefin er í tilskipun ásamt því að tilgreina dráttarvél sem innlendan réttindaflokk.
- Í 2. gr. er kveðið á um snið dagsetninga.
- Með 3. gr. er orðalagi sem lýsir tákntölunni 95 breytt.
- Með 4. gr. er gerð krafa um að ökuskírteini sé læsilegt og slík krafa skilgreind, m.a. út frá hæð stafa.
Minnt er á að umsagnarfrestur er til 5. desember.