Hoppa yfir valmynd
4. mars 2022 Utanríkisráðuneytið

Utanríkisráðherra lýsti áhyggjum af mannréttindum í Úkraínu vegna innrásar Rússa

Frá umræðunni í mannréttindaráðinu - mynd

Stuðningur íslenskra stjórnvalda við úkraínsku þjóðina var ítrekaður og innrás Rússlands harðlega fordæmd í myndbandsávarpi Þórdísar Kolbrúnar Reykfjörð Gylfadóttur utanríkisráðherra í mannréttindaráði Sameinuðu Þjóðanna. Tveggja daga sérstakri umræðu sem fram fór í ráðinu um stöðu mannréttinda í Úkraínu lauk í dag.

„Rússland hefur valið leið stríðs og tortímingar og er innrásin í Úkraínu ein alvarlegasta ógn við frið og öryggi Evrópu og heim allan,“ sagði utanríkisráðherra í ávarpi sínu. “Undirrót stríðsrekstrar Rússa er að grafa undan þeim gildum sem við höfum lengi unnið ötullega að – umburðarlyndi, frið og mannréttindum – sem mannréttindaráð Sameinuðu þjóðanna hefur jafnframt umboð til að standa vörð um og vernda.“

Þá lýsti utanríkisráðherra áhyggjum af afleiðingum innrásar Rússlands á mannréttindi úkraínskra borgara og því mannfalli sem orðið hefur. Hundruð þúsunda væru nú þegar á flótta. Tryggja þyrfti nauðsynlega mannúðaraðstoð og virðingu fyrir alþjóðlegum mannúðarlögum.

Í morgun samþykkti ráðið harðorða ályktun um aðgerðir Rússlands í Úkraínu með yfirgnæfandi meirihluta atkvæða. Í ályktuninni er innrás Rússlands í Úkraínu fordæmd og þess krafist að Rússar hverfi tafarlaust frá Úkraínu með herlið sitt. Þá kveður ályktunin á um að stofnuð verði sérstök rannsóknarnefnd sem safnar og greinir gögn um mannréttindabrot og brot á mannúðarlögum sem framin hafa verið af hálfu Rússlands í Úkraínu. Ísland var meðflytjandi ályktunarinnar og hefur fastanefnd Íslands í Genf tekið virkan þátt í samningaviðræðum um hana undanfarna daga.

Ávarp utanríkisráðherra má lesa í heild sinni hér.

  • Niðurstaða atkvæðagreiðslu um ályktunina - mynd

Efnisorð

Heimsmarkmiðin

17. Samvinna um markmiðin

Hafa samband

Ábending / fyrirspurn
Ruslvörn
Vinsamlegast svaraðu í tölustöfum