Hundrað milljóna króna framlag til OCHA

Utanríkisráðuneytið hefur nýverið lokið greiðslu síðari hluta 100 milljóna króna framlags til Samhæfingarskrifstofu Sameinuðu þjóðanna vegna mannúðarmála (OCHA). Um er að ræða greiðslur í sérstakan sjóð OCHA fyrir óeyrnamerkt framlög en úr þeim sjóði eru veittir fjármunir til hjálparstofnana SÞ og félagasamtaka á þeim svæðum þar sem neyðarástand ríkir.

Að þessu sinni voru greiddar 25 milljónir króna til neyðarsjóðs vegna Palestínu og 25 milljónir króna til sjóðs vegna neyðarástandsins á vatnasvæðinu sem kennt er við Tsjad. Á þessu ári þurfa tæplega 11 milljónir íbúa á því svæði í norðanverðri Mið-Afríku á mannúðaraðstoð að halda. Á síðasta ári tókst með naumindum að forða hungursneyð en mikil vannæring er útbreidd meðal íbúa á stríðshrjáðum svæðum í Nígeríu, Níger, Tjad og Kamerún. Þá eru rúmlega fjórar milljónir á vergangi í fyrrnefndum ríkjum.

Áður höfðu verið greiddar 50 milljónir króna til tveggja sjóða sem sinna mannúðaraðstoð vegna ástandsins í Sýrlandi, í Líbanon annars vegar og Sýrlandi hins vegar.