Fimm þúsund staðfest tilfelli inflúensu í heiminum

Staðfest inflúensutilfelli voru alls 5.132 í morgun í 30 ríkjum í heiminum samkvæmt upplýsingum Sóttvarnarstofnunar ESB. Tvö staðfest tilfelli eru komin fram í Noregi, tvö í Svíþjóð og eitt í Danmörku. Staðfest dauðsföll vegna flensunnar eru 53 talsins, flest í Mexíkó eða 48, þrjú dauðsföll eru staðfest í Bandaríkjunum, eitt í Kanada og eitt í Kosta Ríka.

• Alþjóðaheilbrigðisvöld halda óbreyttu viðbúnaðarstigi sínu enn um sinn og viðbúnaði hérlendis er haldið áfram á hættustigi.
• Engin tilfelli hafa verið greind hér á landi enn sem komið er og enginn lagður inn á Landspítalann með alvarleg inflúensulík einkenni.
• Jafnvel þó einstaklingar greinist hér á landi með inflúensu A (H1N1) mun það að öðru óbreyttu ekki breyta viðbúnaðarstigi hér á landi. Ef hins vegar kemur í ljós að sjúkdómurinn af völdum inflúensunnar fer að verða alvarlegri erlendis eða hérlendis kallar það á frekari viðbrögð.
• Þó svo að Alþjóðaheilbrigðisstofnunin lýsi yfir 6. stigi (hæsta stigi) verða viðbrögð hér á landi ekki aukin frá því sem nú er á meðan sýkingin er væg.
• Á næstunni verður hafist handa við að uppfæra svæðisáætlanir sem eru hluti af viðbúnaðaráætlun gegn heimsfaraldri.

Upplýsingar um inflúensuna og ráðstafanir í því sambandi er að finna á landlaeknir.is, almannavarnir.is, influensa.is og heimasíðum Sóttvarnarstofnuanr Evrópusambandsins - ECDC, http://www.ecdc.europa.eu/ og Alþjóðaheilbrigðismálastofnunarinnar - WHO, http://www.who.int/en/.

Útbreiðsla inflúensu A (H1N1) að morgni 11. maí 2009

(Heimild: Sóttvarnastofnun Evrópusambandsins http://www.ecdc.europa.eu/)