Sumarstörf fyrir námsmenn auglýst til umsóknar
Vinnumálastofnun hefur auglýst laus til umsóknar 230 sumarstörf fyrir námsmenn hjá opinberum stofnunum. Störfin eru ætluð þeim sem eru 18 ára á þessu ári eða eldri og eru á milli anna eða skólastiga. Efnt hefur verið til sambærilegs átaksverkefnis um sumarstörf síðastliðin fimm sumur.
Félags- og húsnæðismálaráðherra ákvað í vor í samræmi við tillögu Vinnumálastofnunar að verja um 150 milljónum króna úr Atvinnuleysistryggingasjóði til að skapa störf fyrir námsmenn í sumar hjá opinberum stofnunum og sveitarfélögum. Ráðningartíminn er tveir mánuðir. Störfin skiptast milli opinberra stofnana og sveitarfélaga og eru 230 hjá ríkinu og 135 hjá sveitarfélögunum.