Hoppa yfir valmynd
19. apríl 2021 Utanríkisráðuneytið

Milljónir sjá fram á matarskort næstu mánuði

Útimarkaður í Kano, Nígeríu. Ljósmynd: WFP/Arete/Adetona Omokanye - mynd

Rúmlega 31 milljón íbúa Vestur- og Mið-Afríku kemur að óbreyttu til með að draga fram lífið við hungurmörk á næstu mánuðum vegna „eitraðrar blöndu“ stórhækkandi matvælaverðs, stríðsátaka og afleiðinga heimsfaraldurs kórónuveiru. Að sögn Matvælaáætlunar Sameinuðu þjóðanna (WFP) hafa hungraðir í þessum heimshluta ekki verið fleiri í marga áratugi og miðað við sama tíma fyrir ári hefur þeim sem hafa lítið að bíta og brenna fjölgað um 30 prósent.

Að mati WFP þarf að grípa til tafarlausra aðgerða til að forða stórslysi. Mánuðirnir sem í hönd fara eru jafnan nefndir „mögru mánuðirnir“ í þessum heimshluta en uppskerutíminn hefst í september.

„Í Vestur-Afríku valda átök nú þegar hungri og vesöld. Sífelld hækkun verðs á matvælum margfaldar eymdina og þá örvæntingu sem henni fylgir,“ segir Chris Nikoi svæðisstjóri WFP í Vestur-Afríku. „Jafnvel þegar matur er í boði hafa fjölskyldur einfaldlega ekki efni á honum – og síhækkandi matvælaverð leiðir til þess að ein grunnmáltíð er milljónir fátækra fjölskyldna ofviða.“

Aðgerðir til að draga úr útbreiðslu COVID-19 eru meðal skýringa á hækkun matvælaverðs og á sama tíma hefur orðið tekjufall hjá mörgum fjölskyldum. Nikoi segir að von milljóna fjölskyldna sé bundin við mataraðstoð þar til ytri aðstæður verði fólki hagfelldar.

Matvælaáætlun Sameinuðu þjóðanna þarf 770 milljónir bandarískra dala til að fjármagna stuðninginn í 19 löndum Vestur- og Mið-Afríku næstu sex mánuði. Matvælaaðstoðin myndi ná til þeirra 18 milljóna íbúa í þessum heimshluta sem verst er staddir.

Efnisorð

Heimsmarkmiðin

2. Ekkert hungur
17. Samvinna um markmiðin

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira