Hoppa yfir valmynd
6. september 2008 Innviðaráðuneytið

Tímabært að ræða lágmarksíbúafjölda sveitarfélaga

Kristján L. Möller samgönguráðherra sagði á þingi Fjórðungssambands Vestfirðinga í gær að tímabært væri að ræða hugsanlega hækkun á lágmarksfjölda íbúa sveitarfélaga. Sagði hann töluna 1.000 hafa verið nefnda en lágmarksíbúafjöldi í dag er 50.

Samgönguráðherra ávarpaði þing Fjórðungssambands Vestfirðinga
Samgönguráðherra ávarpaði þing Fjórðungssambands Vestfirðinga

Samgönguráðherra sagði ætlun stjórnvalda að endurskoða verkaskiptingu ríkis og sveitarfélaga og að efla sveitastjórnarstigið. Málefni aldraðra og fatlaðra yrðu á árunum 2011 til 2012 flutt til sveitarfélagana. Það þýddi mikla tilfærslu fjármuna og í framhaldi af því spurði hann hvort sveitarfélögin væru nógu stór og öflug til að takast á við slík verkefni. Rætt hefði verið um að fyrir ný velferðarverkefni sveitarfélaga yrðu mynduð þjónustusvæði með 7.000-8.000 íbúum að lágmarki.

Af tíu sveitarfélögum á Vestfjörðum er aðeins Ísafjarðarbær með yfir þúsund íbúa, í Bolungarvík og Vesturbyggð byggju kringum 900 íbúar en mun færri í hinum sveitarfélögunum. Samgönguráðherra sagði að frumvarp um hækkaðan lágmarksíbúafjölda yrði hugsanlega lagt fram á þingi í vetur og yrði sveitarfélögum gefinn kostur á að velja sameiningarkosti og þeim gefinn aðlögunartími. Sagði hann að breytingar gætu gengið í gegn árin 2012 til 2014. Óskaði ráðherrann sérstaklega eftir að fá fram sjónarmið sveitarstjórnarmanna í þessu sambandi.

Auk sveitarstjórnarmálanna ræddi ráðherrann um samgöngumál, nefndi það sem unnið væri að í ár og framundan væri, meðal annars að hraða útboði fyrir göng milli Arnarfjarðar og Dýrafjarðar og ljúka frekari uppbyggingu nýrra vega á sunnanverðum Vestfjörðum.

Einnig minntist ráðherrann á þá uppbyggingu á GSM farsímaþjónustu sem unnið hefði verið að á liðnum misserum á vegum fjarskiptasjóðs og greindi frá tilboðum sem borist hefðu í uppbyggingu háhraðaþjónustu sem stefnt væri að því að ljúka á næsta ári.


Hér má sjá glærukynningu sem samgönguráðherra talaði út frá á fundinum.

      

 
 Samgönguráðherra ávarpaði þing Fjórðungssambands Vestfirðinga  
Þing Fjórðungssambands Vestfirðinga stendur um helgina að Reykhólum.  
 

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum