Hve hratt er ráðlegt að aka?

Umferðaröryggisaðgerð um leiðbeinandi hraðamerkingar hefst í næstu viku þegar fyrsta leiðbeinandi hraðaskiltið verður sett upp.

Fyrir tæplega ári síðan kynnti samgönguráðherra aðgerðaáætlun í umferðaröryggismálum undir yfirskriftinni „Breytum þessu“ og á síðastliðnu vorþingi var umferðaröryggisáætlun samþykkt, sem hluti af samgönguáætlun, á Alþingi.

Í næstu viku kemur til framkvæmda ein þeirra aðgerða sem samgönguráðherra hefur boðað, þegar fyrsta leiðbeinandi hraðaskiltið verður afhjúpað.

Í framhaldinu mun Vegagerðin annast uppsetningu skilta með leiðbeinandi upplýsingum um ökuhraða á tiltekna staði á stofnvegum og helstu tengivegum. Leiðbeinandi hraði er miðaður við akstursskilyrði á auðum blautum vegi eins og gert er ráð fyrir í forsendum hönnunarhraða á vegstöðlum og er því verið að upplýsa vegfarendur um öruggan hraða við þær aðstæður.

Tilgangur með leiðbeinandi hraðamerkingum á þjóðvegum er að fækka dauðaslysum og alvarlega slösuðumi í umferðinni. Við vinnslu umferðaröryggisáætlunar var val á aðgerðum til aukins umferðaröryggis byggt á áætlaðir arðsemi einstakra aðgerða. Á tímabilinu 2005-2008 verður 1.540 milljónum króna varið til eftirfarandi verkefna, en vonir standa til um ávinningur aðgerðanna verði fækkun dauðaslysa um að jafnaði 4,2 á ári og fækkun alvarlegra slasaðra um að jafnaði 14,5 á ári.

Umferðarstofa mun halda utan um framkvæmd umferðaröryggisáætlunar og hefur ráðuneytið falið stofnuninni að birta árlega skýrslu um stöðu mála og ávinning aðgerða.