Greiðsluafkoma ríkissjóðs janúar-maí 2006

• Greiðslur ríkissjóðs janúar-maí 2006 (PDF 95K)

Greiðsluuppgjör ríkissjóðs fyrir janúar til maí 2006 liggur nú fyrir. Samkvæmt uppgjörinu eykst handbært fé frá rekstri um 28,3 milljarða króna innan ársins, sem er 16,7 milljörðum hagstæðari útkoma heldur en á sama tíma í fyrra. Þá er útkoman 21,5 milljörðum hagstæðari en gert var ráð fyrir í áætlun fjárlaga. Tekjur reyndust um 18,5 milljörðum hærri en í fyrra á meðan að gjöldin lækka um 0,4 milljarða. Hreinn lánsfjárjöfnuður er jákvæður um 25,9 milljarða króna sem er 7,8 milljörðum betra en á sama tíma í fyrra.

Sjóðstreymi ríkissjóðs janúar – maí 2006

(Í milljónum króna)

Heildartekjur ríkissjóðs námu 155 ma.kr. á fyrstu fimm mánuðum þessa árs sem er tæpum 19 ma.kr meiri innheimta en á sama tíma í fyrra, eða 13,6% aukning. Ef tekið er tillit til tilfærslu milli mánaða vegna tekjuskatts lögaðila nemur hækkunin liðlega 11%. Skatttekjur og tryggingagjöld jukust meira eða um tæp 18% að nafnvirði. Á sama tíma hækkaði almennt verðlag um 5,2% og raunaukning skatttekna og tryggingagjalda var því tæp 12%. Arðgreiðslur vegna Landsímans á þessu tímabili í fyrra skýra 42% samdrátt annarra rekstrartekna milli ára.

Skattar á tekjur og hagnað námu 56 ma.kr. og jukust um 14 ma.kr. frá síðasta ári, eða 32%. Þar af jókst tekjuskattur einstaklinga um 11% og lögaðila um 76% (þá er leiðrétt fyrir fyrrgreindri tilfærslu) og fjármagnstekjuskattur um 43%. Innheimt tryggingagjöld jukust um 15% milli ára en launavísitala Hagstofunnar hækkaði um 8,5% á sama tímabili. Innheimta eignarskatta nam 4,7 ma.kr. sem er 25% minna en á sama tímabili í fyrra. Þar af námu stimpilgjöld 3,5 ma.kr. en innheimta þeirra hefur dregist saman um 15% frá fyrra ári, meðal annars vegna þess að dregið hefur úr skuldbreytingu lána.

Almennir veltuskattar hafa hækkað um rúm 17% frá fyrra ári, eða 11,5% umfram hækkun vísitölu neysluverðs. Tekjur af virðisaukaskatti hafa aukist um 18% sem jafngildir 12% raunaukningu. Vegna lagabreytingar sem felur í sér rýmri greiðslufrest á virðisaukaskatti og aðflutningsgjöldum fer marktækni samanburðar við fyrra ár eftir því hvaða tímabil innan ársins er til skoðunar en sé litið á hreyfanlegt meðaltal nokkurra mánaða kemur fram að hægt hefur á raunvexti tekna af sköttum sem lagðir eru á vöru og þjónustu. Af einstökum liðum hafa vörugjöld af ökutækjum aukist mest en þau skiluðu 25% meiri tekjum en á sama tíma í fyrra.

Greidd gjöld nema 126,2 milljörðum króna og lækka um 0,4 milljarða milli ára, eða um 0,3%. Vaxtagreiðslur lækka um 7,7 milljarða, einkum vegna þess að stór flokkur spariskírteina var á innlausn í apríl í fyrra. Að vöxtum undanskildum hækka heildargjöldin um 7,3 milljarða eða um 6,5%. Mestu munar um 1,9 milljarða hækkun  heilbrigðismála og 1,8 milljarða hjá almannatrygginga- og velferðarmálum. Þá hækka greiðslur til menntamála um 1,4 milljarða. Samtals vega þessir þrír málaflokkar tæplega ⅔ af heildargjöldum ríkissjóðs fyrir utan vexti. Greiðslur til löggæslu hækka um 0,7 milljarða og greiðslur til menningarmála um 0,6 milljarða. Greiðslur til efnahags- og atvinnumála standa í stað milli ára.

Lántökur ársins nema aðeins 11 milljörðum króna þrátt fyrir 38,1 milljarðs afborganir lána. Mismunurinn er fjármagnaður með handbæru fé frá rekstri.

Eiginfjárframlag ríkisins í Nýsköpunarsjóði var aukið um 1 milljarð króna á árinu og 1,7 milljarðar voru greiddir til Lífeyrissjóðs starfsmanna ríkisins í því skyni að lækka framtíðarskuldbindingar ríkissjóðs.

Tekjur ríkissjóðs janúar–maí 2006

Gjöld ríkissjóðs janúar–maí 2006