Áhugi á auknu samstarfi Íslands og Bandaríkjanna
Gunnar Bragi Sveinsson utanríkisráðherra átti í gær fund í varnarmálaráðuneyti Bandaríkjanna þar sem hann ræddi samskipti Íslands og Bandaríkjanna við Chuck Hagel varnarmálaráðherra og Christine H. Fox aðstoðarvarnarmálaráðherra.
Þá var rætt um loftrýmiseftirlit á Íslandi, rekstur loftvarnarkerfisins og samstarf ríkjanna á vettvangi Atlantshafsbandalagsins.
Utanríkisráðherra átti einnig í gær fund með Victoriu Nuland, aðstoðarutanríkisráðherra, þar sem tvíhliða samstarf Íslands og Bandaríkjanna, öryggis- og varnarmál, norðurslóðasamstarf og málefni Atlantshafsbandalagsins voru til umfjöllunar. Ráðherrarnir ræddu þróun mála í Úkraínu og hvernig best verði stutt við uppbyggingu í landinu. Í því ljósi ræddu þeir samskipti ríkjanna við Rússland.
Í fyrradag ræddi utanríkisráðherra mikilvægi þess að styrkja enn frekar tengsl Íslands og Bandaríkjanna á sviði viðskipta, ferðaþjónustu og fjárfestinga við Catherine A. Novelli, aðstoðarutanríkisráðherra efnahags-, umhverfis og orkumála. Novelli sýndi notkun Íslendinga á jarðhita mikinn áhuga og ræddi möguleika á að nýta jarðhitaþekkingu í öðrum löndum sem þyrftu á umhverfisvænni orku að halda.
Á fundum sínum í bandaríska utanríkisráðuneytinu hefur Gunnar Bragi rætt hvalveiðar Íslendinga og ítrekað að þær séu sjálfbærar, byggist á traustri vísindaráðgjöf og séu löglegar samkvæmt alþjóðasamningum. Þá voru reifaðar hugmyndir um hvernig efla megi vísindasamstarf Íslands og Bandaríkjanna á þessu sviði.
Í fyrradag átti Gunnar Bragi einnig fund með Lisu Murkowski, öldungardeildarþingmanni, þar sem þróun mála á norðurslóðum var til umfjöllunar.