Hoppa yfir valmynd
22. apríl 2016 Utanríkisráðuneytið

Öryggismál í Evrópu rædd í Lettlandi

Lilja ásamt utanríkisráðherrum Eistlands og Svíþjóðar - mynd

Samskiptin við Rússland, flóttamannastraumurinn í Evrópu, orkuöryggi, hryðjuverk og aðrar öryggisógnir voru á meðal umræðuefna utanríkisráðherrafundar Norðurlandanna, Eystrasaltsríkjanna og Visegrad-ríkjanna svokölluðu (Ungverjaland, Slóvakía, Tékkland og Pólland), sem Lilja Alfreðsdóttir utanríkisráðherra tók þátt í og lauk fyrir stundu. Fundurinn fór fram í Lettlandi.

Utanríkisráðherrarnir ræddu stöðu öryggismála í Evrópu, ekki síst í ljósi átakanna í austurhluta Úkraínu. Þá heldur flóttamannastraumurinn frá átakasvæðum í Sýrlandi og víðar til Evrópu áfram að reyna á innviði og samstarf Evrópuríkja. Ráðherrarnir ræddu einnig hryðjuverkaógnina í Evrópu og fjölluðu um samskipti Atlantshafsbandalagsins og Rússlands, en fyrr í vikunni var fundað á ný í NATO-Rússlandsráðinu eftir tæplega tveggja ára hlé.

"Þetta var mjög áhugaverður fundur tólf vinaríkja og ánægjulegt að hitta fyrir svo marga samráðherra í minni fyrstu opinberu ferð erlendis sem utanríkisráðherra. Það er ljóst að öryggismálin í Evrópu og flóttamannastraumurinn verða áfram ofarlega á baugi og Ísland mun eftir sem áður freista þess að leggja gott eitt til í nafni samstöðu og samvinnu í þessum flóknu úrlausnarefnum", segir Lilja. Orkuöryggi var eitt af megin umfjöllunarefnum hjá ráðherrunum. Ráðherra vakti athygli á jarðhitanýtingarverkefnum á vegum íslenskra aðila í Mið-Evrópu sem stuðla að bættri orkunýtingu í álfunni með aukinni nýtingu endurnýjanlegra orkugjafa.

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum