Áslaug Arna ræddi samnorræna stefnu um netöryggi við forsætisnefnd Norðurlandaráðs

Áslaug Arna Sigurbjörnsdóttir, háskóla-, iðnaðar- og nýsköpunarráðherra, mætti á fund forsætisnefndar Norðurlandaráðs 15. desember sl. til að ræða samnorræna stefnu um netöryggi og norræna framkvæmdaáætlun þar um.

Í opnunarávarpi Áslaugar Örnu fór hún yfir stöðu netöryggismála á Íslandi og samnorrænt samstarf á því sviði. Hún lýsti tækifærum sem fólgin eru í því að leiða saman málefnasvið netöryggis, háskóla, vísinda, nýsköpunar, tækni og iðnaðar. Aldrei hefur verið jafn mikil þörf og nú að auka hæfni og getu þjóða til að efla netöryggi. Í því samhengi ættu Norðurlöndin að stefna að öflugu samstarfi varðandi netöryggismenntun, t.a.m. á háskólastigi.

„Öryggi net- og upplýsingakerfa er grundvöllur þess að hægt verði að nýta til fulls möguleika stafrænna lausna,“ sagði Áslaug Arna. „Alþjóðlegt samstarf er í þessu samhengi mjög mikilvægt, því netöryggismál eru án landamæra og áskoranir þeirra stöðugt vaxandi. Ef Norðurlöndin vilja vera fremst í röð í nýtingu stafrænnar tækni með öruggum hætti er mikilvægt að efla samstarf á milli þeirra.“

Áslaug Arna nefndi fleiri dæmi um möguleika á auknu samstarf Norðurlandanna, t.d. með því að útvíkka samstarf landsbundna öryggis- og viðbragðsteyma á Norðurlöndunum, með samnýtingu á kostnaðarsömum tækjum fyrir djúpgreiningar á veikleikum og atvikum og með gagnkvæmri miðlun áhættumats á sviði netöryggis. Þá eru tækifæri fólgin í að auka samstarf Norðurlandanna þegar kemur að áherslum á netöryggi hjá Evrópusambandinu, t.d. í tengslum við evrópskt regluverk.

Áhugaverðar umræður spruttu í framhaldi af opnunarávarpi Áslaugar Örnu þar sem fulltrúar forsætisnefndar lögðu fram spurningar til ráðherra.

Um forsætisnefnd Norðurlandaráðs

Forsætisnefnd Norðurlandaráðs er pólitísk stjórn Norðurlandaráðs og ber ábyrgð á umfangsmiklum pólitískum málum, skipulagningu og fjárhagsáætlunum auk utanríkis- og varnarmálasamstarfi þjóðþinganna. Forsætisnefndin ber einnig ábyrgð á samræmingu tengsla við þjóðþing og aðrar svæðisbundnar og alþjóðlegar stofnanir. Forsætisnefndin hefur mikið samstarf við Eystrasaltsráðið, sem er vettvangur þingsamstarfs Eistlands, Lettlands og Litháens.

Meira um forsætisnefnd Norðurlandaráðs.