Hoppa yfir valmynd
Heilbrigðisráðuneytið

Sjúkraflugvél verður í Vestmannaeyjum um verslunarmannahelgina

Tryggt hefur verið að sjúkraflugvél verður staðsett í Vestmannaeyjum um verslunarmannahelgina. Heilbrigðisráðherra fól nýlega Sjúkratryggingum Íslands að semja við Mýflug hf. um þetta, en kostnaðarauki vegna þessa er 725 þúsund krónur.

„Eðlilegt er að fullt viðbúnaðarstig sé í Vestmannaeyjum þessa helgi, þegar íbúafjöldi margfaldast. Ákvörðunin er tekin í samræmi við mat á aðstæðum,” segir Álfheiður Ingadóttir heilbrigðisráðherra. Á dögunum bötnuðu samgöngur við Vestmannaeyjar með opnun Landeyjahafnar sem gæti haft í för með sér aukinn gestafjölda í Eyjum um verslunarmannahelgina.

Samkomulagið við Mýflug hf. felur í sér að frá hádegi föstudaginn 30. júlí til miðnættis mánudaginn 2. ágúst verður Chieftainvél Mýflugs staðsett í Vestmannaeyjum til sjúkraflutninga. Miðað er við það að Heilbrigðisstofnun Vestmannaeyja beri ábyrgð á og útvegi sjúkraflutningamenn eða aðra heilbrigðisstarfsmenn ef þörf krefur, til sjúkraflutninga með Chieftainvélinni meðan vélin verður staðsett í Vestmannaeyjum.

Mýflug hefur annast sjúkraflug á Vestmannaeyjasvæði frá Akureyri í kjölfar þess að Flugfélag Vestmannaeyja, sem áður hafði um skeið sinnt fluginu, missti flugrekstrarleyfi sitt.


Efnisorð

Hafa samband

Ábending / fyrirspurn


Þessi síða notar vafrakökur Lesa meira