Arnór Snæbjörnsson skipaður forstöðumaður úrskurðarnefndar umhverfis- og auðlindamála
Umhverfis-, orku- og loftslagsráðherra hefur tekið ákvörðun um að skipa Arnór Snæbjörnsson í embætti forstöðumanns úrskurðarnefndar umhverfis- og auðlindamála til næstu fimm ára.
Arnór lauk embættisprófi í lögfræði frá Háskóla Íslands 2006 og meistaraprófi í sagnfræði frá sama skóla árið 2015, auk þess hefur hann lokið diplómaprófi í hafrétti. Þá hefur hann stundað meistaranám í stjórnun og stefnumótun við HÍ.
Arnór öðlaðist réttindi sem héraðsdómslögmaður árið 2008 og starfar hann í dag sem lögfræðingur í matvælaráðuneytinu. Frá árinu 2012 starfaði hann í atvinnuvega- og nýsköpunarráðuneytinu, fyrst sem sérfræðingur á skrifstofu sjávarútvegs og fiskeldis til 2018, þegar hann varð yfirlögfræðingur á sviði sjávarútvegs og landbúnaðar og sem settur skrifstofustjóri skrifstofunnar tímabundið 2020. Áður starfaði Arnór sem lögfræðingur og deildarstjóri í landbúnaðarráðuneytinu og sem starfsmaður skrifstofu löggjafarmála í forsætisráðuneytinu. Hann hefur verið í stjórn Hafréttarstofnunar frá árinu 2016.
Arnór hefur sinnt margþættum störfum á vegum íslenskra stjórnvalda og er m.a. stundakennari við Háskóla Sameinuðu þjóðanna á Íslandi.
Embætti forstöðumanns úrskurðarnefndar umhverfis- og auðlindamála var auglýst í febrúar sl. og sóttu sjö um embættið.