Hoppa yfir valmynd
18. nóvember 2020 Utanríkisráðuneytið

Sameinuðu þjóðirnar freista þess að afstýra hungursneyð

Ljósmynd: Sameinuðu þjóðirnar. - mynd

„Mesti árangur mannkyns var að koma hungursneyð í sögubækurnar. Það stingur því í hjartað að horfast í augu við hana á nýjan leik á sama tíma og við framleiðum nægan mat til að næra sérhvern einstakling í heiminum,“ segja Mark Lowcock og David Beasley í sameiginlegri grein sem birtist í breska dagblaðinu Times í gær. Þeir eru yfirmenn tveggja stofnana Sameinuðu þjóðanna, Samhæfingarskrifstofu aðgerða í mannúðarmálum (OCHA) og Matvælaáætlunar Sameinuðu þjóðanna (WFP).

Sameinuðu þjóðirnar ákváðu í gær að verja eitt hundrað milljónum Bandaríkjadala úr neyðarsjóð samtakanna (CERF) til að freista þess að afstýra hungursneyð í sjö heimshlutum sem eru í mestri hættu vegna matarskorts. Hungrið er tilkomið vegna átaka, efnahagslegrar hnignunar, loftslagsbreytinga og heimsfaraldurs kórónuveirunnar.

Af þessum hundrað milljónum dala verður áttatíu milljónum skipt á milli Afganistan, Búrkína Fasó, Lýðstjórnarlýðveldisins Kongó, Nígeríu, Suður-Súdan og Jemen, en hæsta framlagið fer til Jemen, þrjátíu milljónir. Tuttugu milljónirnar sem út af standa verða eyrnamerktar Eþíópíu þar sem útlit er fyrir að þurrkar bætist ofan á alvarlegt ástand sem þegar ríkir í landinu.

„Þegar Nóbelsnefndin veitti Matvælaáætlun Sameinuðu þjóðanna friðarverðlaunin kvaðst hún vilja beina sjónum heimsins að þeim milljónum jarðarbúa sem þjást af hungri eða standa frammi fyrir slíkri ógn. Við erum því hjartanlega sammála. Þegar rúmlega fjórðungur úr milljarði mannkyns er kominn fram á hengibrún er ekki hægt að horfa í aðra hátt, hvað þá að hverfa á braut,“ segir í grein framkvæmdastjóranna.

Efnisorð

Heimsmarkmiðin

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira