Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
24. febrúar 2023 Utanríkisráðuneytið

Föstudagspóstur 24. febrúar 2023

Heil og sæl. 

Enn er runninn upp föstudagur og hann ber í skauti sér föstudagspóst að vanda.

 

Þórdís Kolbrún Reykfjörð Gylfadóttir utanríkisráðherra er stödd í Strassborg þar sem hún stýrir formlegum fundi ráðherranefndar Evrópuráðsins um afleiðingar árásarstríðs Rússa í Úkraínu en í dag er ár liðið frá innrásinni. 

Í tilefni af tímamótunum er úkraínska fánanum flaggað víða og helstu byggingar og stofnanir lýstar í fánalitunum til að sýna samstöðu. 

 

 

Auk þess er úkraínska fánanum flaggað við flestar sendiskrifstofur Íslands. Myndir og myndskeið má finna á instagram síðu ráðuneytisins og samfélagsmiðlum sendiráðanna. Flestar sendiskrifstofur hafa einnig tekið þátt í ýmsum samstöðu viðburðum með Úkraínu sem greint er frá á sömu miðlum.

Heimsókn utanríkisráðherra til Strassborgar er önnur ferð hennar til Evrópuráðsins en sú fyrsta var í tilefni upphafs  formennsku Íslands í Evrópuráðinu í nóvember síðastliðnum. 

Að þessu sinni er tilefnið þríþætt. Að minnast þess að ár er liðið frá upphafi innrásar Rússlands á Úkraínu, ávarpa fund undirbúningsnefndar aðildarríkja Evrópuráðsins fyrir leiðtogafundinn sem Ísland stýrir og vera viðstödd sérstaka óperusýningu í Opera National du Rhin þar sem útsetning Önnu Þorvaldsdóttur á La Voix Humaine eftir franska tónskáldið Poulanc er sett á fjalirnar sem hluti af menningardagskrá formennsku Íslands í Evrópuráðinu.

Skammt er stórra högga á milli hjá utanríkisráðherra þessa dagana en síðastliðinn föstudag var hún stödd í München í Þýskalandi þar sem hún tók þátt í árlegri ráðstefnu um öryggismál. Á ráðstefnunni komu saman ríflega eitt þúsund þátttakendur, þar á meðal fjölmargir þjóðarleiðtogar, utanríkisráðherrar og varnarmálaráðherrar ásamt fræðafólki og öðrum skoðanamótandi aðilum á sviði öryggis- og varnarmála. Á ráðstefnunni gafst utanríkisráðherra jafnframt tækifæri til að eiga tvíhliða fundi, þar á meðal með Riad Malki utanríkisráðherra Palestínu, Ilia Darchiashvili utanríkisráðherra Georgíu, Donika Gërvalla-Schwarz sem gegnir embætti utanríkisráðherra og er varaforsætisráðherra Kósovó auk óformlegs fundar með Sviatlöna Tsikhanouskayu leiðtoga lýðræðisafla Belarús.

Fraktflugvél á vegum íslenskra stjórnvalda flaug með 100 tonn af neyðarbirgðum til jarðskjálftasvæðanna í Tyrklandi þar sem milljónir manna eru húsnæðislausar. Þá hefur utanríkisráðherra ákveðið að veita 50 milljón króna neyðarframlagi til Sýrlands vegna ástandsins sem skapaðist þar í kjölfar skjálftanna fyrr í mánuðinum. Lesa má meira um málið í frétt á stjórnarráðsvefnum. 

Og þá að sendiskrifstofunum: 

Martin Eyjólfsson ráðuneytisstjóri heimsótti fastanefnd Íslands hjá Sameinuðu þjóðunum í New York og tók þátt í viðburði sem fór fram í allsherjarþingi Sameinuðu þjóðanna í tilefni af því að ár er liðið frá innrás Rússlands í Úkraínu.


Í Peking tók Þórir Ibsen sendiherra þátt í opnun stærstu CO2-to-methanol verksmiðju í heimi í Kína. Tæknin sem notast er við kemur frá íslenska fyrirtækinu Carbon Recycling International.

 

Þá greindi sendiráðið einnig frá Norrænni kvikmyndaviku sem fer fram í borginni um helgina.

Berliner Zeitung fór í vikunni yfir kosti íslensku lopapeysunnar með Maríu Erlu Marelsdóttur sendiherra.

Sendiráð Íslands í Malawi birti á dögunum frábærlega framsett kort sem sýnir á skýran og aðgengilegan hátt uppbyggingu Íslands á svæðinu. Um er að ræða yfir 1200 staði þar sem Ísland hefur átt aðkomu að uppbyggingu sem gaman er að kynna sér nánar.

Í London var efnt til kynningar á EGF Power Serum, nýjustu vöru BIOEFFECT, í sendiherrabústaðnum.

Kristín Anna Tryggvadóttir ferðaðist á vegum sendiráðs Íslands í Nýju-Delí til Manipur til að taka þátt í "B20" þar sem yfir 200 þátttakendur frá öllum heimshornum hittust og deildu hugmyndum um tækifæri og samvinnu á sviði viðskipta. Viðburðurinn tengist formennsku Indlands á næsta G20 fundi.

Sendiráð Íslands í Ottawa tók þátt í viðburði með norrænum sendiráðum í Kanada um málefni norðurslóða. Viðburðurinn fór fram í Toronto þar sem fulltrúum sendiráðanna gafst færi á að ræða við nemendur í Munk School of Clobal Affairs and Public Policy. 

 

Sendiherrahjónin í Osló sóttu hádegisverðarfund í boði forstjóra UMAMI ARENA þar sem stórgott tækifæri gafst til tengslamyndunar um markaðssókn erlendis og alþjóðlegt samstarf á sviði matvæla og matarmenningar.

Í sendiráðinu í París var bolludagurinn haldinn heilagur.

Og Katrín Jakobsdóttir forsætisráðherra ávarpaði ráðstefnu UNESCO um netöryggi. 

Í Stokkhólmi voru menningarmál í forgrunni í vikunni en þar var sagt frá heimsókn rithöfundarins Arnaldar Indriðasonar, sérstökum viðburði til minningar Burt Bacharach þar sem fram komu fjölmargir listamenn, þeirra á meðal íslensk söngkona að nafni Stina Ágústsdóttir og því að rithöfundurinn Sjón hefði hlotið norrænu verðlaun Sænsku akademíunnar 2023. 

Sendiráð Íslands í Tókýó segir frá Miyukino Film Festival sem fer fram nú um helgina, þar sem íslenskar stuttmyndir verða meðal dagskrárliða. 

Þar á bæ sló starfsfólk ekki slöku við í bollubakstri í vikunni. 

Í Varsjá var haldið upp á bolludag, sprengidag og öskudag og farið yfir sögu daganna í glæsilegum og læsilegum færslum á samfélagsmiðlum sendiráðsins.

Í Þórshöfn í Færeyjum fóru fram frábærir tónleikar í Løkshøll þar sem Andri Björn Róbertsson og Ástríður Alda Sigurðardóttir fluttu meistaraverk eftir ýmsa höfunda.

Í Genf var sagt frá því að Einar Gunnarsson sendiherra hefði nýlega tekið við formennsku í samningviðræðum um fiskveiðistyrki hjá Alþjóðaviðskiptastofnuninni.

Í Bandaríkjunum bar bolludaginn upp á forsetadaginn, þar sem forsetar Bandaríkjanna frá upphafi eru heiðraðir. Sendiráð Íslands í Washington greindi frá því. 

Að lokum vekjum við athygli á áhugaverðri frétt í Heimsljósi þar sem sagt er frá nýjum gögnum frá Alþjóðaheilbrigðisstofnuninni, WHO, sem leiða í ljós þá sorglegu staðreynd að á degi hverjum deyja tæplega átta hundruð konur á meðgöngu eða við fæðingu. 

Föstudagspósturinn verður ekki lengri að sinni. 

Við biðjum ykkur lengst allra orða að njóta helgarinnar.

Bestu kveðjur frá upplýsingadeild.

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum