Hoppa yfir valmynd
20. janúar 2023 Utanríkisráðuneytið

Ísland eykur stuðning sinn við Úkraínu ​

Þórdís Kolbrún, Lloyd Austin, varnarmálaráðherra Bandaríkjanna, Jens Stoltenberg, frkvstj. Atlantshafsbandalagsins, og Oleksii Reznikov, varnarmálaráðherra Úkraínu. - myndNATO

Ísland mun veita tveimur milljónum punda, eða rúmlega 360 milljónum króna, í sérstakan stuðningssjóð fyrir Úkraínu (International Fund for Ukraine) sem bresk stjórnvöld settu á laggirnar á síðasta ári.Þórdís Kolbrún Reykfjörð Gylfadóttir utanríkisráðherra tilkynnti um þetta á fundi ríkjahóps sem styður varnarbaráttu Úkraínu (Ukraine Defence Contact Group) sem haldinn var í Ramstein í Þýskalandi í dag.

Hópinn skipa 45 líkt þenkjandi ríki. Ísland hefur áður stutt við varnargetu Úkraínu gegnum þennan sama sjóð en einnig sjóði á vegum Atlantshafsbandalagsins og með stuðningi við hergagnaflutninga, sendingu á vetrarbúnaði og sprengjueyðingaþjálfun, svo fátt eitt sé nefnt.

„Ísland hefur leitað allra leiða til þess að leggja varnarbaráttu Úkraínu lið. Á fundinum hér dag var mikil samstaða og áhersla á að nú væri mikilvægur kafli í stríðinu og mikilvægt að þau sem vilja styðja Úkraínu liggi ekki á liði sínu. Það hefur sýnt sig að stuðningssjóðurinn sem við leggjum nú lið hefur reynst vel, þar eru ákvarðanir teknar hratt svo mikilvægur stuðningur berst hratt þangað sem þörfin á honum er mest. Jafnvel þó Íslendingar hafi ekki vopn eða skotfæri til að senda til Úkraínu þá getum við aðstoðað með öðrum leiðum og það munum við halda áfram að gera,“ segir Þórdís Kolbrún.

Varnarmálaráðherra Bandaríkjanna, Lloyd J. Austin, stýrði fundinum en hann sóttu varnarmálaráðherrar og yfirmenn herafla þátttökuríkjanna. Varnarmálaráðherra Úkraínu, Oleksii Reznikov, ávarpaði fundinn og gerði grein fyrir vígstöðunni í landinu og þörfum úkraínska hersins fyrir stuðning.

  • Þórdís Kolbrún ásamt Oleksii Reznikov, varnarmálaráðherra Úkraínu og Jens Stoltenberg, frkvstj. Atlantshafsbandalagsins. - mynd

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum