1200 hugmyndir frá 38 skólum
Sköpunarkraftur, hugvit og útsjónarsemi einkenndi þær hugmyndir sem dómnefnd valdi til að taka þátt í vinnusmiðjum keppninnar þetta árið. Um 40 nemendur hvaðanæva af landinu komu saman í Háskólanum í Reykjavík um liðna helgi til þess að þróa sín verkefni og fræðast um frumkvöðlastarf.
Meðal þeirra verkefna sem unnið var með voru hækkanlegur snagi, hallanlegur hjólastóll, stærðfræðikennslusmáforrit. Sigurvegarar keppninnar að þessu sinni voru Anna Valgerður Árnadóttir og Oliwia Huba nemendur úr 6. bekk í Brekkubæjarskóla á Akranesi sem hannað hafa Hafragrautsuppáhellarann – tímastillta grautargerðarvél sem margir gætu án ef óskað sér að eignast.
Mennta- og menningarmálaráðuneyti gengst fyrir Nýsköpunarkeppni grunnskólanna en Nýsköpunarmiðstöð Íslands sér um rekstur hennar og skipulag í samstarfi við Háskólann í Reykjavík, Háskóla Íslands, Menntamálastofnun, Samband íslenskra sveitarfélaga, Samtök iðnaðarins og o.fl. aðila.