Hoppa yfir valmynd
11. október 2016 Forsætisráðuneytið

Burt með launamuninn - jafnrétti og jafnlaunamál á íslenskum vinnumarkaði

Launajafnrétti - lógó - mynd

Aðgerðahópur stjórnvalda og samtaka aðila vinnumarkaðarins kynnir tillögur um framtíðarstefnu í jafnlaunamálum á morgunverðarfundi á Reykjavík Hilton Nordica, mánudaginn 24. október næstkomandi kl. 8.00–10.30.

Samhliða kynningu á tillögum aðgerðahópsins mun Eygló Harðardóttir, félags- og húsnæðismálaráðherra, opna vefsíðu jafnlaunastaðalsins og kynna nýtt jafnlaunamerki. Á fundinum verður jafnframt sagt frá tilraunaverkefni um innleiðingu jafnlaunastaðalsins og forystufólk atvinnulífsins tekur þátt í pallborðsumræðum um hvernig hrinda megi tillögum um framtíðarstefnu í jafnlaunamálum í framkvæmd. 

Sérstakur gestur fundarins er dr. Kjersti Misje Østbakken, rannsakandi við Social Research Institute í Osló. Kjersti hefur um árabil lagt stund á rannsóknir á sviði vinnumarkaðsfræða og jafnlaunamála. Í fyrirlestrinum veltir hún upp spurningunni um af hverju gangi eins hægt og raun ber vitni að útrýma kynbundnum launamun. Á árunum 2002–2014 minnkaði launamunur kynjanna aðeins um tvö prósentustig í Noregi; úr 14% í 12% og sýna nýjustu tölur að meðaltímakaup norskra kvenna er svipað og það var hjá körlum fyrir sex árum. Líkt og rannsóknir aðgerðahóps um launajafnrétti sýna segir Kjersti að kynjaskipting starfa á vinnumarkaði skýri að einhverju leyti launamuninn. Konur og karlar gegni ólíkum störfum og kynjaskipting milli starfsgreina sé mjög áberandi í Noregi líkt og á Íslandi. Laun og launaþróun sé mismunandi milli starfsgreina og almennt megi segja að þær greinar sem karlar velja þyki verðmætari á vinnumarkaði. Þegar laun kvenna og karla í sömu atvinnugreinum eru borin saman þá sjáum við að þrátt fyrir sambærilega menntun, aldur og starfsaldur þá eru laun karla samt um 7% hærri. 

Verkefni aðgerðahópsins hafa meðal annars falist í því að vinna að samræmingu rannsókna á kynbundnum launamun, annast kynningu og fræðslu vegna innleiðingar jafnlaunastaðals, sinna upplýsingamiðlun og ráðgjöf um launajafnrétti og gerð tillagna um framtíðarstefnu í jafnlaunamálum. Í maí 2015 kynnti hópurinn niðurstöður rannsóknarverkefna hópsins á fundinum Kyn, starfsframi og laun. Annars vegar er um að ræða fyrstu rannsókn sem gerð hefur verið hér á landi á kynbundnum launamun og tekur til vinnumarkaðarins í heild og hins vegar rannsóknarskýrslu um stöðu kvenna og karla á vinnumarkaði. Tillögur hópsins um framtíðarstefnu í jafnlaunamálum byggjast á niðurstöðum rannsóknarverkefna hópsins. 


Burt með launamuninn!

Jafnrétti og jafnlaunamál á íslenskum vinnumarkaði

 

Morgunverðarfundur, 24. október 2016 kl. 08.00–10.30, á Reykjavík Hilton Nordica.

Kynning á tillögum aðgerðahóps stjórnvalda og samtaka aðila vinnumarkaðarins um framtíðarstefnu í jafnlaunamálum.

Fundarstjóri: Anna Kolbrún Árnadóttir, formaður aðgerðahóps um launajafnrétti.

Dagskrá

08.00–08.30 Skráning og morgunverður framreiddur.
08.30–08.40 Eygló Harðardóttir, félags- og húsnæðismálaráðherra. Ávarp, opnun vefsíðu jafnlaunastaðalsins og kynning á jafnlaunamerki.
08.40–09.00 Dr. Kjersti Misje Østbakken, Senior Research Fellow, Institute for Social Research Oslo. Slow Convergence in the gender pay gap: Empirical Evidence from Norway.
09.00–09.15 Maríanna Traustadóttir, sérfræðingur í jafnréttismálum hjá ASÍ. Kynning á tillögum aðgerðahóps um launajafnrétti um framtíðarstefnu í jafnlaunamálum.
09.15–09.30 Guðný Einarsdóttir, sérfræðingur í fjármála- og efnahagsráðuneytinu. Kynning á tilraunaverkefni um innleiðingu jafnlaunastaðalsins.
09.30–09.45 Pallborð: Reynslusögur þátttakenda í tilraunaverkefni um innleiðingu jafnlaunastaðalsins.
09.45–10.15 Hvernig á að hrinda tillögum um framtíðarstefnu í jafnlaunamálum í framkvæmd? Pallborðsumræður með forystufólki atvinnulífsins. Umræðustjóri:  Dr. Sigrún Stefánsdóttir, forseti hug- og félagsvísindasviðs Háskólans á Akureyri.
10.15–10.30 Fyrirspurnir og umræður.

Morgunverðarhlaðborð er innifalið í þátttökugjaldi sem er 5.000 kr. 

Morgunverður er framreiddur frá kl. 8.00.

Efnisorð

Var efnið hjálplegt?
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn
Ruslvörn
Vinsamlegast svaraðu í tölustöfum