Hinn 3. júlí 2025 kvað úrskurðarnefnd um upplýsingamál upp svohljóðandi úrskurð nr. 1286/2025 í máli ÚNU 25050011.
 

Kæra og málsatvik

Með erindi, dags. 10. maí 2025, kærðu […] til úrskurðar­nefnd­ar um upp­lýsingamál tafir á afgreiðslu […]ráðuneytis á beiðni þeirra um upp­lýsingar. Með erindi, dags. 3. apríl 2025, lögðu kærendur fram svohljóðandi beiðni:
 

Það liggur fyrir að trúnaðarupplýsingar um mál sem við sendum til ráðuneytisins eru geymd­ar í opnum, glærum plastvasa þvert á óskir okkar og samþykki fyrir slíkri vinnslu upp­lýsinga. […] því vantar okkur upplýsingar um:

1. Hvar hefur plastvasinn verið geymdur frá því að gögnin voru prentuð út í októ­ber 2024.
2. Ef plastvasinn er geymdur í skáp óskum við eftir ljósmynd af skápnum, ef hann er ekki geymdur í skáp óskum við eftir ljósmynd af staðsetningunni þar sem hann hefur verið geymdur.
3. Ef plastvasinn er geymdur í læstum skáp óskum við eftir upplýsingum um hvern­ig honum er læst og hverjir eru með og hafa haft aðgang að skápnum (þ.e. lykil eða lykilorð).
4. Hversu mörg trúnaðarmál eru geymd í opnum glærum plastvösum hjá ráðu­neyt­inu.
5. Hversu mörg mál eru geymd í sama skáp eða öðrum geymslustað þar sem okkar mál er.
6. Hvaða rými innan ráðuneytisins er geymslustaður plastvasans í (sic) og hverjir eru með og hafa haft aðgang að því rými.

Niðurstaða

Upplýsingaréttur almennings tekur samkvæmt 1. mgr. 5. gr. upplýsingalaga, nr. 140/2012, til að­gangs að fyrir­liggj­andi gögnum sem varða tiltekið mál og aðgangs að tilteknum fyrirliggjandi gögn­um. Þegar aðili sem heyrir undir gildis­svið laganna tekur á móti erindi sem ber með sér að vera beiðni um aðgang að gögn­um á hann að athuga hvort fyrir liggi annaðhvort þau gögn sem beinlínis er óskað eftir eða gögn sem innihalda þær upplýsingar sem tilgreindar eru í beiðninni, og taka ákvörðun um hvort aðgangur að gögn­un­um á grundvelli upplýsingalaga verði veittur.
 
Af upplýsingalögum verður ekki leidd sambærileg skylda til að svara erindum sem bera ekki með sér að vera beiðnir um að­gang að gögnum. Ekki er útilokað að skylt kunni að vera að bregðast við slík­um erind­um, sbr. 1. mgr. 7. gr. stjórnsýslulaga, nr. 37/1993, og óskráða leið­beiningar­reglu þess efnis að stjórn­völd­um sé skylt að veita þeim sem til þeirra leita nauð­synlega aðstoð og leið­bein­ing­ar varðandi þau mál sem snerta starfssvið þeirra. Þá er það óskráð regla að skriflegum erindum borgaranna til stjórnvalda, sem bera það með sér að svars sé óskað, skuli að minnsta kosti svarað þannig að borgaranum megi vera ljóst hvort erindið muni leiða til frekari viðbragða stjórnvaldsins. Það er hins vegar ekki hlutverk úrskurðar­nefnd­ar um upp­lýs­inga­mál að skera úr um rétt beiðanda til að fá svar við slíku erindi, sbr. 3. mgr. 17. gr. upp­lýs­inga­laga, sbr. og 4. mgr. 9. gr. stjórnsýslulaga, eða ágrein­ing um það hvort erindinu hafi verið svarað með full­nægjandi hætti, sbr. 1. mgr. 20. gr. sömu laga, enda byggja framan­greind­ar kæruheimildir á því að beð­ið hafi verið um aðgang að gögnum.
 
Úrskurðarnefndin hefur farið yfir erindi kærenda til […]ráðuneytis og telur erind­ið ekki bera með sér að vera beiðni um fyrirliggjandi gögn í skilningi upplýsingalaga, heldur beiðni um upp­lýsingar um hvernig vörslu gagna sé háttað innan ráðuneytisins. Af þeim sökum verður kær­unni vísað frá úrskurðar­nefnd­inni.
 

Úrskurðarorð

Kæru […], dags. 10. maí 2025, sem varðar beiðni um upplýsingar um vörslu gagna, er vísað frá úrskurðarnefnd um upplýsingamál.
 
 
 
 
Trausti Fannar Valsson, formaður
Hafsteinn Þór Hauksson
Sigríður Árnadóttir