Mál nr. 500/2024-Úrskurður
Úrskurðarnefnd velferðarmála
Mál nr. 500/2024
Fimmtudaginn 20. febrúar 2025
A
gegn
Vinnumálastofnun
Ú R S K U R Ð U R
Mál þetta úrskurða Hólmfríður Birna Guðmundsdóttir lögfræðingur, Agnar Bragi Bragason lögfræðingur og Arnar Kristinsson lögfræðingur.
Með kæru, dags. 10. október 2024, kærði B, f.h. A, til úrskurðarnefndar velferðarmála ákvörðun Vinnumálastofnunar, dags. 17. september 2024, um að synja umsókn fyrirtækisins um ráðningarstyrk.
I. Málsatvik og málsmeðferð
Með ákvörðun Vinnumálastofnunar, dags. 17. september 2024, var kæranda tilkynnt að umsókn um ráðningarstyrk hefði verið synjað þar sem atvinnuleitandi uppfyllti ekki skilyrði styrks.
Kærandi lagði fram kæru hjá úrskurðarnefnd velferðarmála 10. október 2024. Með bréfi, dags. 16. október 2024, óskaði úrskurðarnefndin eftir greinargerð Vinnumálastofnunar vegna kærunnar. Greinargerð Vinnumálastofnunar barst 12. nóvember 2024 þar sem fram kom að hin kærða ákvörðun hefði þegar verið afturkölluð. Með bréfi úrskurðarnefndar, dags. 13. nóvember 2024, var óskað eftir afstöðu kæranda til greinargerðar Vinnumálastofnunar. Sú beiðni var ítrekuð með tölvupósti 15. janúar 2025. Svar barst ekki.
II. Niðurstaða
Kærð er ákvörðun Vinnumálastofnunar, dags. 17. september 2024, um að synja umsókn kæranda um ráðningarstyrk. Í greinargerð Vinnumálastofnunar til úrskurðarnefndarinnar var vísað til þess að hin kærða ákvörðun í málinu hefði þegar verið afturkölluð.
Hlutverk úrskurðarnefndar velferðarmála er að úrskurða í kærumálum vegna stjórnvaldsákvarðana eftir því sem mælt er fyrir um í lögum sem kveða á um málskot til nefndarinnar, sbr. 1. gr. laga nr. 85/2015 um úrskurðarnefnd velferðarmála. Samkvæmt 11. gr. laga nr. 54/2006 um atvinnuleysistryggingar kveður úrskurðarnefndin upp úrskurði um ágreiningsefni sem kunna að rísa á grundvelli laganna. Þar sem Vinnumálastofnun hefur afturkallað hina kærðu ákvörðun verður ekki séð að ágreiningur sé til staðar á milli kæranda og stofnunarinnar. Þar sem enginn ágreiningur er til staðar í máli þessu er kæru vísað frá úrskurðarnefndinni.
Ú R S K U R Ð A R O R Ð
Kæru A, er vísað frá úrskurðarnefnd velferðarmála.
F.h. úrskurðarnefndar velferðarmála
Hólmfríður Birna Guðmundsdóttir