Mál nr. 63/2024 - Álit
ÁLIT
KÆRUNEFNDAR HÚSAMÁLA
í máli nr. 63/2024
Aðgengi að gögnum húsfélags. Frávísun að hluta.
I. Málsmeðferð kærunefndar
Með álitsbeiðni, dags. 11. júní 2024, beindi A hér eftir nefndur álitsbeiðandi, til nefndarinnar erindi vegna ágreinings við Húsfélagið B, hér eftir nefnt gagnaðili.
Auk álitsbeiðni voru greinargerð gagnaðila, mótt. 22. janúar 2025, og athugasemdir álitsbeiðanda, dags. 27. janúar 2025, lagðar fyrir nefndina.
Málið var tekið til úrlausnar á fundi nefndarinnar 31. mars 2025.
II. Helstu málsatvik og ágreiningsefni
Um er að ræða fjöleignarhúsið C, sem er raðhús með níu eignarhlutum. Álitsbeiðandi er eigandi eignarhluta að C 3, en gagnaðili er húsfélagið.
Kröfur álitsbeiðanda eru:
- Að viðurkennt verði að honum sé heimilt að reisa girðingu utan um eign hans og að kostnaður við það sé sameiginlegur.
- Að viðurkennt verði að hann eigi rétt á aðgengi að öllum fundargerðum fyrri funda.
- Að viðurkennt verði að allar aðgerðir sem ákveðnar hafi verið á síðasta húsfundi verði framkvæmdar án tafar.
- Að viðurkennt verði að geymd ökutæki verði þegar fjarlægð af sameiginlegum bílastæðum.
- Að viðurkennt verði að öllum erindum hans til gagnaðila skuli svarað sem fyrst.
- Að viðurkennt verði að afhenda skuli honum afrit af öllum fjármálum síðastliðinna fimm ára.
Álitsbeiðandi kveður sig ítrekað og árangurslaust reynt að hafa samband við gagnaðila. Síðasti húsfundur hafi verið haldinn árið 2023 en engin fundargerð hafi borist. Þá hafi ekki enn komið til framkvæmda þær ákvarðanir sem teknar hafi verið á fundinum. Samkvæmt lögum um fjöleignarhús hefði aðalfundur átt að vera haldinn fyrir lok apríl 2024, en hann hafi ekki enn farið fram.
Gagnaðili kveður undirbúning aðalfundar vegna ársins 2024 í gangi og að hann verði haldinn í janúar eða febrúar 2025. Allir ársreikningar hafi verið birtir, en viðurkennt sé að ársreikningur vegna 2023 hafi verið birtur of seint. Með þessum undirbúningi hafi gagnaðili ekki vanrækt skyldu sína samkvæmt lögum, þótt viðurkennt sé að aðalfundur hafi ekki verið haldinn innan lögbundins frests. Störf gagnaðila séu unnin í sjálfboðavinnu og einungis níu eignarhlutar séu í húsinu. Flutningar hafi verið í húslengjunni, formaður gagnaðila hafi flutt í mars 2024 og í apríl 2024 hafi orðið andlát í fjölskyldu gjaldkera. Af þeim sökum hafi aðrir eigendur verið upplýstir um að gjaldkeri þyrfti fresta fundinum. Allar skyldur sem settar séu samkvæmt lögum um fjöleignarhús þurfi að skoða með hliðsjón af því að erfitt sé að fá aðila til sinna húsfélagsstörfum og því sé öll vinna í sjálfboðavinnu.
Allar fundargerðir frá fyrri fundum séu aðgengilegar á sameiginlegu Facebook svæði gagnaðila, sem öllum félagsmönnum sé veittur aðgangur að. Þetta fyrirkomulag sé bæði sanngjarnt og hagkvæmt. Álitsbeiðandi sé hvattur til að nýta þennan vettvang til að nálgast fundargerðir og fylgjast með starfsemi gagnaðila. Álitsbeiðandi hafi ítrekað krafist annars konar fyrirkomulags, þar sem hann vilji ekki nota Facebook. Vísað sé í meginreglur fjöleignarhúsalaga því til stuðnings að sé meirihluti eigenda sáttir með gagnageymslu og að gögn séu opinber og öllum tryggt aðgengi verði að telja að álitsbeiðandi þurfi að leggja það á sig að skrá sig inn á Facebook og sækja umbeðin gögn. Íþyngjandi beiðnir um útprentanir eða annars konar skjalageymslu eigi sér ekki lagastoð og séu ósanngjarnar gagnvart sjálfboðaliðastarfi gagnaðila.
III. Forsendur
Í 1. mgr. 80. gr. laga nr. 26/1994 um fjöleignarhús er kveðið á um að greini eigendur fjöleignarhúsa á um réttindi sín og skyldur samkvæmt lögum þessum geti þeir, einn eða fleiri, leitað til kærunefndar og óskað eftir álitsgerð um ágreiningsefnið.
Í greinargerð gagnaðila kemur fram að fyrirhugað sé að halda aðalfund og að á þeim fundi verði málefni vegna girðingar- og bílastæða tekin fyrir. Að fenginni greinargerðinni tekur álitsbeiðandi undir að þau málefni verði lögð fyrir aðalfundinn. Verður því þegar að vísa frá kröfuliðum I, IV og V.
Í kröfulið III fer álitsbeiðandi fram á viðurkenningu á því að gagnaðila beri að ráðast í allar framkvæmdir sem ákveðnar hafi verið á síðasta húsfundi. Málatilbúnaði sínum til stuðnings leggur álitsbeiðandi engin gögn fram eða rökstuðning umfram það sem fram kemur í II kafla álitsins hér að framan, en þess utan hefur kærunefndin engar heimildir til að skylda aðila máls til að framkvæma tilteknar athafnir. Verður því jafnframt að vísa frá kröfu álitsbeiðanda í lið III.
Í 6. mgr. 69. gr. laga um fjöleignarhús er kveðið á um að stjórn og framkvæmdastjóra sé skylt að veita eigendum upplýsingar og skýringar um öll atriði er varða málefni húsfélagsins, rekstur þess, sameiginlegt viðhald, efnahag og fjárhagsstöðu. Skulu eigendur hafa rétt til að skoða bækur félagsins, reikninga og fylgiskjöl með hæfilegum fyrirvara en þó jafnan að viðstöddum stjórnarmanni. Í kröfuliðum II og VI óskar álitsbeiðandi viðurkenningar á því að hann eigi rétt á aðgengi að öllum fundargerðum fyrri funda sem og fjármálum síðastliðinna fimm ára. Ekkert styður það að þessi gögn séu ekki aðgengileg honum eða að honum hafi verið neitað um aðgengi að þeim. Þá verður álitsbeiðandi að una því fyrirkomulagi sem gagnaðili hefur ákveðið um aðgengi að gögnum og hefur gagnaðili upplýst að fundargerð síðasta aðalfundar liggi nú fyrir en dregist hafi að útbúa hana. Til viðbótar við framangreint er kröfugerð álitsbeiðanda hér um almennt orðuð og sett fram án rökstuðnings. Verður því ekki fallist á þessar kröfur.
Álit nefndarinnar hindrar ekki aðila í að leggja ágreining sinn fyrir dómstóla með venjulegum hætti, sbr. 6. mgr. 80. gr. laga um fjöleignarhús.
IV. Niðurstaða
Það er álit kærunefndar að vísa beri frá kröfum á álitsbeiðanda í liðum I, III, IV og V.
Kröfum álitsbeiðanda í liðum II og VI er hafnað.
Reykjavík, 31. mars 2025
Auður Björg Jónsdóttir
Víðir Smári Petersen Eyþór Rafn Þórhallsson