Hoppa yfir valmynd
27.03.2020 14:18 Félagsmálaráðuneytið

Hjálparsími og netspjall Rauða krossins eflt með stuðningi félagsmálaráðuneytis

Vegna mikils álags á Hjálparsíma Rauða krossins, 1717, og netspjallið, 1717.is  hefur félagsmálaráðuneytið ákveðið að styðja við þjónustuna. Stuðningurinn mun efla Hjálparsímann og netspjallið í að sinna meðal annars fjölskyldum, börnum og ungmennum, fötluðu fólki, öldruðum og fólki af erlendum uppruna á þeim fordæmalausu tímum sem nú eru uppi vegna COVID-19

Hjálparsíminn 1717 og netspjallið 1717.is er opið allan sólarhringinn þar sem þjálfaðir og reynslumiklir sjálfboðaliðar á öllum aldri sjá um að svara þeim símtölum og skilaboðum sem berast. Auk þess að styðja við og efla það starf sem þar er þegar unnið mun félagsmálaráðuneytið tengja Hjálparsímann við aðra  aðila sem veita viðkvæmum hópum þjónustu og ráðgjöf, bæði stofnanir og félagasamtök. Starfsfólk Hjálparsímans mun þannig leitast við að greina aðstæður þeirra sem hafa samband, veita þeim hefðbundinn stuðning og vísa þeim á fagaðila sem gætu boðið viðkomandi frekari aðstoð eftir eðli vandans. Sérstök áhersla verður lögð á að efla netspjall Rauða krossins, en það er sú leið sem flest börn og ungmenni nýta til að hafa samband. Markmiðið er að tryggja að greiður aðgangur sé að stuðningi og aðstoð fyrir þá sem það þurfa, vegna álags, streitu, ofbeldis, vanlíðan eða annarra orsaka. 

Ásmundur Einar Daðason, félags-og barnamálaráðherra: „Þegar álag og streita í samfélögum er mikil, leikur stuðningur og ráðgjöf mikilvægt hlutverk. Með þessu samstarfi viljum við að tryggja það að viðkvæmir hópar í samfélaginu fái nauðsynlegan stuðning og þjónustu á þessum óvenjulegu tímum.“

Kristín S. Hjálmtýsdóttir, framkvæmdastjóri Rauða krossins á Íslandi: „Við erum þakklát fyrir aukinn stuðning frá félagsmálaráðuneytinu sem gerir okkur kleift að sinna hlutverki okkar enn betur núna og komið til móts við þarfir fólks. Það hefur verið gríðarleg aukning í samtölum sem okkur berast sl. vikur og við höfum fjölgað mjög þeim sem svara í símann. Sjálfboðaliðar hafa brugðist vel við og eru ómetanlegir fyrir okkar starf.“

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira