Hoppa yfir valmynd
07.05.2020 16:20 Fjármála- og efnahagsráðuneytið

Greining á mögulegri stærðargráðu áfalls vegna heimsfaraldurs kórónuveiru

Fjármála- og efnahagsráðuneytið hefur unnið greiningar sem miða að því að varpa ljósi á mögulega stærðargráðu áfallsins sem hagkerfið stendur frammi fyrir vegna heimsfaraldurs kórónuveiru. Greining ráðuneytisins byggir á raunhæfum en nokkuð svartsýnum forsendum um dýpt kreppunnar. Niðurstöður hennar fela ekki í sér spá um líklegustu framvindu efnahagsmála heldur sviðsmynd um mögulega efnahagsframvindu að gefnum forsendum um að ferðamenn skili sér ekki til landsins það sem eftir lifir árs og að árið 2021 sæki 1 milljón ferðamanna landið heim. Til samanburðar gerir nýleg sviðsmynd KPMG ráð fyrir 1,3 milljón ferðamönnum á næsta ári.

Niðurstöður greiningarinnar, sem unnin var 20. apríl, eru á þá leið að hagkerfið gæti dregist saman um u.þ.b. 9% í ár ef forsendur hennar raungerast. Verði það niðurstaðan er um að ræða ívið minni samdrátt en samanlagt árin 2009 og 2010. Þá bendir greiningin til þess að hagkerfið gæti vaxið um 5% strax á næsta ári. Niðurstöðurnar gefa til kynna að einkaneysla gæti dregist saman um 9% í ár en vaxið kröftuglega á því næsta. Talsverðan hluta samdráttarins má rekja til hruns í neyslu Íslendinga á ferðalögum erlendis sem aðeins var gert ráð fyrir að skili sér að hluta í innlenda neyslu. Útlit er fyrir að fyrr verði undið ofan af sóttvarnaaðgerðum en forsendur sviðsmyndarinnar gerðu ráð fyrir og vísbendingar hafa þegar borist um að samdráttur einkaneyslu gæti reynst minni en niðurstöður greiningarinnar gefa til kynna. Atvinnuleysi yfir árið gæti reynst í tveggja stafa tölu, en hafa ber hugfast að síðan greiningin var unnin hefur hlutastarfaleið stjórnvalda verið framlengd um tvo mánuði. Útlit er fyrir mesta útflutningssamdrátt frá því mælingar hófust en töluverður samdráttur innflutnings kemur í veg fyrir að halli myndist á viðskiptajöfnuði.

 


Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira