Hoppa yfir valmynd
19.05.2020 08:23 Heilbrigðisráðuneytið

Áhersla á samstöðu þjóða á þingi WHO

Svandís Svavarsdóttir heilbrigðisráðherra - myndHeilbrigðisráðuneytið

Svandís Svavarsdóttir heilbrigðisráðherra þakkaði fyrir leiðsögn og forystu WHO og hvatti til samstöðu þjóða þegar hún ávarpaði þing Alþjóðaheilbrigðismálastofnunarinnar sem nú stendur yfir. Þingið er haldið í skugga heimsfaraldurs COVID-19 sem er meginumfjöllunarefnið og setur jafnframt mark sitt á umgjörð þess þar sem það er haldið á Netinu.

Svandís sagði leiðsögn WHO hafa reynst Íslandi vel þar sem kapp hefði verið lagt á greiningu smita, smitrakningu og sóttkví til að hindra útbreiðslu veirunnar. Hún sagði íslenska heilbrigðiskerfið hafa staðist álagið vel þar sem sterk, samhæfð, opinber heilbrigðisþjónusta hefði sýnt aðdáunarverðan sveigjanleika og aðlögunarhæfni. „Margt höfum við lært sem mun gagnast við uppbyggingu og endurskipulagningu heilbrigðiskerfisins framundan“ sagði ráðherra meðal annars.

„Áhrif COVID-19 á þjóðir heims eru víðtæk. Nýr veruleiki blasir við. Djúp kreppa, atvinnuleysi og óöryggi setur mark sitt á líf fjölmargra. Við þurfum að fylgjast með áhrifum þessa á líðan fólks og geðheilsu, hlúa að samfélagslegum innviðum og sjá til þess að enginn verði skilinn eftir. Ég nefni hér sérstaklega konur og börn í viðkvæmri stöðu. Ég nefni hér fátækar þjóðir“ sagði ráðherra og ítrekaði að áframhaldandi samstaða þjóða væri grundvallaratriði í áframhaldandi baráttu við faraldurinn og til að mynda ein meginforsendan fyrir þróun bóluefnis við faraldrinum.

„Við búum í samfélagi þjóða og við eigum okkur sameiginleg markmið. Látum heimsmarkmið Sameinuðu þjóðanna verða vegvísi okkar inn í framtíðina og skiljum engan eftir“ sagði Svandís Svavarsdóttir heilbrigðisráðherra í lok ávarps síns á 73. þingi Alþjóðaheilbrigðismálastofnunarinnar sem hér er birt í heild sinni á íslensku.

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira