Sendiherra afhendir trúnaðarbréf á Spáni

Unnur Orradóttir Ramette sendiherra í París afhenti Felipe VI. Spánarkonungi trúnaðarbréf við hátíðlega athöfn í dag, á annan í hvítasunnu. Við það tilefni ræddu þau tvíhliða samskipti landanna, sameiginlegar áskoranir og gildi á alþjóðlegum vettvangi og tækifæri til frekari samvinnu, m.a. á sviði vísinda, nemendaskipta og Norðurslóða. 

Talið er að tæplega 1% íslensku þjóðarinnar hafi fasta búsetu á Spáni auk mikils fjölda Íslendinga sem þar dvelja til skemmri tíma. Utan Hollands, er Spánn stærsti útflutningsmarkaður fyrir íslenskar vörur og mikilvægasti áfangastaður Íslendinga í krónum talið (ferðaþjónusta).