Fyrsta heimsókn utanríkisráðherra Mongólíu til Íslands
Þorgerður Katrín Gunnarsdóttir utanríkisráðherra tók í gær á móti Battsetseg Batmunkh, sem er fyrsti utanríkisráðherra Mongólíu til að heimsækja Ísland síðan ríkin tóku upp stjórnmálasamband fyrir fimmtíu árum. Ráðherrarnir undirrituðu við þetta tækifæri viljayfirlýsingu um nánara pólitískt samráð.
Á fundi ráðherranna ræddu þær sömuleiðis um aðra mögulega samstarfsfleti ríkjanna, m.a. á sviði jafnréttismála sem mongólski ráðherrann hefur látið sig miklu varða.
Ísland og Mongólía hafa um árabil unnið saman á sviði landgræðslu og hafa nemendur frá Mongólíu stundað nám við Landgræðsluskóla GRÓ. Ráðherrann heimsótti einmitt skólann í dag, ræddi þar við mongólska nemendur sem þar stunda nám nú um stundir og kynnti sér einnig starfsemi jafnréttis- og jarðhitaskóla GRÓ.
Batmunkh átti auk þess fund með Höllu Tómasdóttur forseta Íslands á Bessastöðum og hitti Þórunni Sveinbjarnardóttur, forseta Alþingis, og Pawel Bartoszek, formann utanríkismálanefndar Alþingis, á meðan dvöl hennar á Íslandi stóð.
