Listasafn Árnesinga tekur við gjöf frá franska listamanninum Bernard Alligand

Kristín Scheving, safnstjóri Listasafns Árnesinga í Hveragerði, tók á móti átta listaverkum í París 12. júní sl. fyrir hönd safnsins. Gjöfina afhenti franski listamaðurinn Bernard Alligand sem hefur sótt innblástur frá Íslandi í rúmlega 20 ár og einnig gefið út bóklistaverk með frumsömdum ljóðum Sigurðar Ingólfssonar og Sigurðar Pálssonar. Listamaðurinn vinnur mest með steinefni frá Íslandi, ýmist á striga eða á pappír. Hann tók þátt í Listahátíð í Reykjavík 2014 þar sem bóklistaverk voru í forgrunni, sér í lagi verk með ljóðskáldinu og höfundinum Michel Butor.

Þá setti hann upp sýningu á verkum sínum í sendiherrabústaðnum í desember 2023 undir yfirskriftinni „Retour d‘Islande“. Við það tækifæri var sýnd heimildarmyndin „Échos“ eftir Axel Clévenot um Íslandsferðir listamannsins sem unnið hefur til ýmissa verðlauna.

Sendiráðið óskar Listasafni Árnesinga til hamingju með gjöfina.