Hoppa yfir valmynd

Frétt

16. desember 2014 Samgöngu- og sveitarstjórnarráðuneytið

Haldið verði áfram undirbúningi að smíði Vestmannaeyjaferju

Ríkisstjórnin ákvað á fundi sínum í morgun að haldið verði áfram undirbúningi að smíði nýrrar Vestmannaeyjaferju. Innanríkisráðuneyti og fjármála- og efnahagsráðuneyti verður falið í samráði við Vegagerðina og Vestmannaeyjabæ að skilgreina og meta hvernig verkefnið verður best fjármagnað og hvaða valkostir séu hagkvæmastir varðandi útboð og eftir atvikum rekstur nýrrar ferju.

Ólöf Nordal innanríkisráðherra lagði málið fyrir ríkisstjórn í morgun og er gert ráð fyrir að niðurstöðum athugunarinnar verði skilað fyrir 15. febrúar og málið þá aftur lagt fyrir ríkisstjórn. Í minnisblaði ráðherra kemur fram að umtalsverður olíukostnaður sparist með því að taka í notkun nýja ferju sem gert er ráð fyrir að sigli í Landeyjahöfn árið um kring og að jafnframt lækki mjög kostnaður við dýpun Landeyjahafnar. Með þessu sparast verulegur kostnaður sem fellur til vegna siglinga Herjólfs til Þorlákshafnar og ljóst er að veruleg samgöngubót fyrir Vestmannaeyinga og aðra verður með reglulegum siglingum til Landeyjahafnar. Samtals er gert ráð fyrir að þessir tveir liðir lækki um nálægt 380 milljónir króna á ári miðað við núverandi kostnað með rekstri Herjólfs.

Athugun ráðuneytanna í samráði við Vegagerðina og Vestmannaeyjabæ mun beinast að því hvaða fjármögnunarmöguleikar eru fyrir hendi og er með þessari tillögu vonast til að ýta megi málinu farsællega áfram.

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Þessi síða notar vafrakökur Lesa meira