Hoppa yfir valmynd

Frétt

30. desember 2015 Heilbrigðisráðuneytið

Gjaldskrárbreytingar vegna heilbrigðisþjónustu um áramót

Gjöld fyrir heilsugæsluþjónustu sjúkratryggðra verða óbreytt um áramót. Gjöld vegna annarrar heilbrigðisþjónustu sjúkratryggðra hækka að jafnaði um 3,2% 1. janúar nk. til samræmis við forsendur fjárlaga næsta árs sem gera ráð fyrir hækkun verðlags sem þessu nemur.

Ný reglugerð um hlutdeild sjúkratryggðra í kostnaði vegna heilbrigðisþjónustu felur í sér 3,2% hækkun gjalda vegna komu og endurkomu á slysadeild og bráðamóttöku sjúkrahúsa, vegna rannsókna og geisla- og myndgreiningar, fyrir komur til sérgreinalækna utan sjúkrahúsa og á göngudeild sjúkrahúsa, vegna krabbameinsleitar og fyrir sjúkraflutninga.

Í verðlagsforsendum fjárlaga er ekki gert ráð fyrir hækkun gjalda í heilsugæslu og verða komu- og vitjanagjöld þar því óbreytt gagnvart þeim sem eru sjúkratryggðir hér á landi.

Einnig hefur verið birt reglugerð um heilbrigðisþjónustu við þá sem ekki eru sjúkratryggðir hér á landi og greiðslur þeirra fyrir heilbrigðisþjónustu sem eiga að endurspegla raunkostnað.

Flóttamenn eru sjúkratryggðir

Vert er að geta þess að í febrúar sl. var samþykkt á Alþingi frumvarp heilbrigðisráðherra um breytingu á lögum um sjúkratryggingar sem hafði það að markmiði að tryggja rétt flóttafólks til heilbrigðisþónustu. Flóttamenn sem stjórnvöld hafa veitt hæli og einstaklingar sem hafa dvalarleyfi á grundvelli mannúðarsjónarmiða eru því sjúkratryggðir hér á landi, að því tilskyldu að þeir séu komnir til landsins og að fyrir liggi staðfesting Útlendingastofnunar á því að viðkomandi hafi verið veitt réttarstaða flóttamanns eða hafi dvalarleyfi á grundvelli mannúðarsjónarmiða samkvæmt lögum um útlendinga.

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Þessi síða notar vafrakökur Lesa meira